3215/2024-2025

Dated Hnahthial the 26th November, 2024: Vawiin khan Hnahthial DC Office Complex-ah central scheme - Prime Minister Dharti Aaba Janjatiya Gram Utkarsh Abhiyan (PM DAJGUA) chungchanga mipuite hnena inhrilhhriatna, IEC Campaign November ni 15 atanga neih tan chu kharna hun hman a ni.

Tribal mipuite tana hamthatna tura duan scheme, PM DAJGUA, IEC Campaign pual hian DC office complex-ah "Mipuite harsatna chinfelna ni" neih niin department hrang hrang - H&FW, Fisheries, EF&CC, PWD, PHE, School Education, Rural Development, W&CWD, UD&PA, SW&TA, DIPRO, A&FW, Horticulture leh MRB te chuan mipui, a mamawh apiangte dawr theih turin zing dar 10 atanga tlai dar 2 thleng an inchhawp chhuak a. He hunah hian free medical check-up te neih niin a mamawh tan Adhaar card siam theihna hmun hawn a ni a. Mizoram Calendar 2025 chu mipui lei theih tura zawrh chhuah nghal bawk a ni.

Kharna programme hi Pi Esther Leihang, SDO Sadar chuan kaihhruaiin kalkhawm mipuite hnenah lawmthu a sawi a. PM DAJGUA chungchang bakah Hnahthial District a kalpui anih dan tur tlangpui chu Lunglei DSWO, Pu CL Josepha hnen atanga ngaihthlak a ni a. PM DAJGUA chu Tribal Affairs Ministry hnuai ami niin central scheme hrang hrang duan tawh sa chu tribal mipuite tan, an mamawh dan azira thawmthat a hnawhkhah anih theih dan tur (gap filling) scheme a nih ber thu a sawi a. Khaw dang neih, kha mi khuain a mamawh a neih ve loh an neih theihna tur bakah an thil mamawh tlangpui phuhruk nan a he scheme hi hman tur anih ber thu sawiin hemi tur atan hian Hnahthialah pawh khaw hrang hrang 15 - Chhipphir, Bualpui V, Rawpui, Pangzawl 'N', Thiltlang, Chawngtui 'S', Cherhlun, Thingsai, Bualpui H, Leite, Rotlang E, Tuipui D, Darzo, Muallianpui leh S Vanlaiphai te chu thlan an nih thu a sawi a. Heng khua te hi Mission Antyodaya hnuaia kum 2022 a PMAGY survey mila thlan an nih thu leh heng khua thlante tan hian scheme puih tur chu thlan tur niin a scheme mila hmalakna kalpui anih tur thu a sawi a. Chumi avang chuan PM DAJGUA chungchangah hian action plan mumal tak siam a tul thu sawiin he scheme hlawhtling taka kalpui anih theih nan Hnahthial District chhunga department zawng zawngte chu tanrualpuiah a sawm nghal bawk a ni.

Bawrhsap Pi Rita Lalnunmawii Pachuau chuan he hunah hian thu sawiin PM DAJGUA IEC Campaign tihhlawhtling thei tura sawmna ngai pawimawha kalkhawm department zawng zawngte hnenah lawmthu a sawi a. PM DAJGUA felfai taka kalpui anih theihna tur atan Block leh District level committee la din anih tur thu leh line departments ho zawng zawng inhnuhkhawmna neih a la nih tur thu a sawi a. Department hrang hrangte inkarah thawhhona tha a awm zel a beisei thu a sawi bawk a ni.

He hunah hian PM DAJGUA IEC Campaign puala "Lalnu Ropuiliani" chungchanga essay writing a inelna, High School leh Higher Secondary School a neih chu lawmman semna neih nghal a ni.