44/2023-2024

Kolasib dated 5th April 2023: Vawiin khan Bilkhawthlir South-ah Local Administration Department hnuai a Rashtriya Gram Swaraj Abhiyan kaltlang a sak,’Arecanut Leaf Plate Production Centre’ hawnna hun hman a ni a. Pu K.Lalrinliana, Minister, LAD, FCS & CA leh Fisheries department changtu chu khuallian niin Pu Lalrinsanga, MLA, Serlui Assembly Constituency chu khual zahawm a ni a, Pu Lalhriatpuia, Secretary, LAD chuan hun a kaihruai a ni.

Minister Pu K.Lalrinliana chuan kuhva chin nana hmun tha tak, kuhva hmun enkawlna kawngah pawh tawnhriat nghah tawh tak Bilkhawthlira kuhva hnah hmang a thleng siam chhuahna hmun hawn theih a ni chuan intodelhna kawngah hmasawnna a thlen ngei a beisei thu a sawi a. Mizoram Sawrkarin Food, Civil Supplies & Consumer Affairs Department kaltlanga ram chhung ngei a tharchhuah buhfai lei tur a duh thu sawiin Bilkhawthlir khua tharchhuah buhfai quintal 23 lei sak tawh a nih thu a sawi.

Pu K.Lalrinliana chuan vawi khat hman plastic tihrem nan leh Bilkhawthlir Self Help Group member-ten eizawnna ngelnghet an neih theih nan ‘Arecanut Leaf Plate Production Centre’ chu hmang turin duhsakna a hlan a, chutih rual chuan tehfung hrang hrang leh a man chhiar chungchangah te ram dang siam el pha tur a tan la turin a chah bawk. Hlawhtlin tum a, tihtak zetna leh tumruhna nen a bei tak takte tan hna thawh sen loh a awm thu Minister chuan sawiin mahni tlin tawk leh theih tawk ang zela hmalak a pawimawh thu a sawi.

Serlui Assembly Constituency chu Mizoram lui pawimawh tak takin a paltlang thu Minister chuan sawiin heng luidungte hi mumal tak a humhalh leh hmalakna kalpui a nih chuan lui sa intodelhna hmanraw tangkai tak ah hman theih a nih thu a sawi a. Mizorama thar chhuah ngei sangha chi pawh Kolasib district atang hian semchhuah a nih tawh thu a sawi bawk a ni.

Khual zahawm Pu Lalrinsanga Ralte, MLA, Serlui Assembly Constituency, Vice Chairman, Rubber & Allied Crops Development Board chuan LAD department kaltlanga ‘Arecanut Leaf Plate Production Centre’ sak puitlin a nih theih nana hmunhma petu Bilkhawthlir khawtlang hruaitute chungah lawmthu sawiin neitu nihna thinlung nen a sak chhung zawng an vilpuite chu fakawm a tih thu a sawi a. Serlui bial a hmasawnna hna thawh thenkhat tarlangin khawtlang inrelbawlna tha leh felfai a awm theih nan LAD kaltlang hian VC house sak thar hna leh VC house awmsa thawmthat hna engemaw zah kalpui a nih thu te, Keichamah kawlphetha thlunzawm a nih tawh thu te, PHC building leh X-ray room thar hawn a nih thu te, ran vulhtute tihhmasawn nan Veterinary Dispensary leh Mobile Veterinary Unit kalpui a nih thu leh Horticulture Office hawn mai theih a peih fel a nih thu leh PWD IB sak hna kalpui mek a nih thu a sawi bawk a ni.

Arecanut Leaf Plate Production Centre, Bilkhawthlir South hawnna hun ah hian Pi Rita Lalnunmawii Pachuau, Director, LAD chuan kalkhawmte lawmna thu sawiin mahni inrelbawl leh intodelh tur a hnathawhna hmunhma buatsaih chu Rashtriya Gram Swaraj Abhiyan thil tum te zinga pawimawh tak a nih thu leh vawi khat hman plastic tihremna tur a hmalakna a nih thu a sawi a. Pu RC Lalzarzova, JE, DLAO, Kolasib hnen atangin report ngaihthlak a ni a, Pu PC Laldinpuia, VCP, Bilkhawthlir South chuan thusawina hun hmang bawkin Pu Lalchawimawia, Joint Director, LAD chuan lawmthu sawina hun a hmang bawk a ni.

Rashtriya Gram Swaraj Abhiyan kaltlanga cheng nuai 43 hmangin Arecanut Leaf Plate Production Centre, Bilkhawthlir hi December ni 6, 2021 khan sak tan a ni a. A in hi chhawng hnih niin Square feet 930 a zau a ni a, January ni 25, 2023 khan sak zawh niin tun a khawl awm mek hmang hian kuhva plate chi 6 a siam theih a ni.