45/2023-2024

Champhai, the 5th April, 2023: Vawiin chawhnu khan Environment, Forest & Climate Change (EF&CC) Minister Pu T.J. Lalnuntluanga chuan Champhai leh a chhehvela Forest Department hmalakna hrang hrangte tlawhin a enfiah.

Minister Pu T.J. Lalnuntluanga hian Champhai Zote rama Nagar Van Project kalpui mekte, Tlangsam rama Satellite Wildlife Rescue Centre siamna tura ruahman hmunhma leh Conservator of Forests (CF), Eastern Circle Pisa, DFO Complex, Champhaia sak mekte tlawhin hmalaknate a enfiah nghal bawk.

Nagar Van-Urban Forest Champhai Zote ami hi khawpui ramngaw, mipuite tana boruak thianghlim pe chhuaktu tur, tuihna siamtu tur, lenkhawthawnna leh thil zirna tana ramngaw humhalhna hmun tur a ni a. Khawtlang hruaitu, NGO, mipui vantlang leh Sawrkar tangruala thawhhona tha tak nen khawpui ramngaw tha din leh humhalh hi a tum a ni a, Nagar Van Scheme hnuaiah hian khawpui ramngaw ven him nana hung, a tulna laia thing phun belh, vantlang remchang siamte a tel a ni. Mizoramah tun dinhmunah Aizawl leh Champhaiahte khawpui ramngaw siam hmalakna Nagar Van Project hi kalpui mek a ni.

Nagar Van Champhai Zote huam chhung ram hectare 50 vela zauah hian thing thawl deuhna laiah thing chi hrang hrang- Theihai, Theifeimung, Avocado, Pear, Theifarbang, Lamkhuang, Thingthupui, Khuangthli, Lenhmui, Tlaizawng, Chawmzil, Tei, Ngiau leh Char 2,000 chuang phun tawh a ni a, phun mek zel a ni bawk.

Ramri kaltlanga nungcha tawlhruk emaw, ram chhunga dan lova nungcha kawl leh tawlh mante dahna leh enkawlna tur Satellite Wildlife Rescue Centre dinna tur hian Tlangsam khaw bul Forest Department ram chhung hectare 20 vela zau chu ruahman a ni a, Sawkar laipuiah project kimchang thehluh niin thutlukna ngaihchan mek a ni.

EF&CC Minister hi Pu R.K. Singh, IFS, Principal Chief Conservator of Forests (PCCF), Pu Pee Lee Ete, IFS, Conservator of Forests (CF), Eastern Circle, Pu Lalduhthlana, DFO Champhai leh Official dangten an tawiawm a ni.