46/2023-2024

Fire & Emergency Services leh Aizawl District Disaster Management Authority tangkawp buatsaihin vawiin khan “CALL 101 Awareness Video leh Kangmei Awareness Street Campaign” tlangzarh a ni a. Hemi puala inkhawm Conference Hall, Fire & Emergency Services Hqrs Office, Hunthar venga buatsaihah Aizawl DC Dr. Lalhriatzuali Ralte, Aizawl District Disaster Management Authority Chairman ni bawk chu khuallian a ni. “CALL 101 Awareness Video” hi khuallian hian a tlangzarh a, ‘Kangmei Awareness Street Campaign Video’ chu Pu C. Lalzahngoa, Director, Fire & Emergency Services in a tlangzarh thung a ni.

Khuallian Dr Lalhriatzuali Ralte chuan Fire & Emergency Services Department ten hna tha taka an thawh thin avangin lawmthu a sawi a. India rama khuarel chhiatna kaihhnawih chawimawina sang ‘Subhash Chandra Bose Aapda Prabandhan Puraskar (SCBAPP) 2023’ Lunglei Fire Station in an dawn avanga a lawmzia leh a lawmman hlanna New Delhi ah Pu Narendra Modi, Prime Minister of India kut ngei atanga an dawn avanga Mizo nih a tihnawmzia leh a chhuanawm a tihzia a sawi. Video tlangzarh tak chungchang sawiin sawiin mipuite hnenah zirtirna tha tak a pek a beisei a, kangmei a lo chhuah a Fire Department te hrilh hriat zung zung theihna number 101 chu mipuiten an hriat vek a pawimawhzia Aizawl DC chuan a sawi a ni.

Pu Francis Lalnuntluanga Ralte SP, Fire & Emergency Services chuan a kaihruai a. Pu Francis Lalnuntluanga Ralte chuan he awareness video siam a nih theihnan sum leh pai ngaihtuahsaktu Dr Lalhriatzuali Ralte Chairman, Aizawl District Disaster Management Authority hnenah lawmthu a sawi a. He video hian nasa takin kangmei a lo chhuah thulhah mipuiten Fire Station an hrilh vat theihna tur Fire Emergency Number 101 chu an lo hriat vek tawh ngei a beisei tih a sawi a ni.