47/2023-2024
Aizawl, the 5th April 2023: Vawiin hi Gauhati High Court kum 75-na champha a ni a; Platinum Jubilee of Hon’ble Gauhati High Court lawmna atan Gauhati High Court – Aizawl Bench chuan Conference Hall, District Court Building, MINECO, Aizawlah Seminar a buatsaih. He hi hi Governor Dr Hari Babu Kambhampati chuan khuallian niin a hmanpui a ni. Gauhati High Court Platinum Jubilee lawmna puala Seminar thupui chu, "Challenges and the way forward for the judiciary in Mizoram", a ni a. Platinum Jubilee lawmna hi Gauhati High Court – Aizawl Bench leh Mizoram Legal Services Authority te tangkawpin an buatsaih a ni.
Justice Marli Vankung, Judge, Gauhati High Court chuan inlawmna thu sawiin Seminar Programme hi tan a ni a. He hunah hian Governor chuan Sovenir Ceramic Plate tlangzarhin thu a sawi a. Mizoram Bar Association aiawhin Pu C. Lalramzauva, Senior Advocate, Adviser to Chief Minister in thu a sawi a. Justice Nelson Sailo, Judge, Gauhati High Court pawhin thu a sawi bawk a ni.
Governor Dr Hari Babu Kambhampati chuan Platinum Jubilee of Gauhati High Court lawmna hunah a tel thei chu lawmawm a tih thu a sawi a. Mipui ten an aiawh an thlanna ram, a bikin India ramah Judiciary pawimawhna - Danpui humhalhtu a nihna te, Democracy lungthu dang pahnih - Executive leh Legislature te khalh ngil tu a nihna te a sawi bawk.
India hmarchhaka chengte chuan a tlangpui thuin Inremna siam a tulin harsatna siam lova, inremna kawng an dap hram thin thu a sawi a. Court a lo awm hma pawhin inhmuthiam lote karah inremna an siam te chu - a theih anga ranga siam leh inremna tluantling tak a ni thin a ni a ti. Mizo te chu remna leh muanna ngaina mi an nih thu leh intihbuaina case pawh tam tak a awm thin lo tih a lo hriat thin avangin lawmawm a tih thu a sawi bawk a ni.
Governor chuan kan rama court thutlukna leh judiciary-ah te rinna kan nghat a, rorelna dik chang turin beiseina eng kan nei hi kan vanneihna a ni tih a sawi a. Hetih rual hian India ram judicial system a thil siamthat ngai chu kan beisei aiin court thutlukna siam chhuah a muang thin hi a ni a ti. Governor chuan, "Rorelna dik pek tlai chu rorelna dik pek duh loh nen anga tehkhin a ni a. Hei hi kan zavai rilruah awm reng se Judicial Community te hian a theih anga rangin court a case lo lut te chin fel thuai a nih theih nan theih tawp chhuah turin ka ngen a ni", a ti.
Governor chuan Gauhati High Court in Platinum Jubilee a lawmna puala zirhona buatsaihah Mizorama Judiciary in hmalam pana hmasawnna kawng zawh chhoh dan tur sawiho a ni chu tha a tih thu a sawi a. Mizorama Judiciary tihhmasawnna atana hmalakna pawimawh tak - eCourts Mission Mode Project kalpui mek a ni chu thil lawmawm tak a ni a. Hei hian tunlai information & communication technology huanga hmasawnna nasa tak thleng mek hmang tangkai turin Court a buatsaih mek a. Hei Cyber Crime Dona kawnga kan hmalak a ti chak sawt anga, kawng tam takah awlsamna a siam dawn a ni a ti.
Platinum Jubilee puala thu a sawi naah Justice Nelson Sailo, Judge Gauhati High Court chuan Mizoram Judiciary-ah hmasawnna nasa tak hmuh tur a awm tawh a, a lawmawm hle a ni a ti. Judiciary in hma a sawnna turah thil pawimawh hmasa chu infrastructure a ni a ti a. Court Infrastructure siam kawngah Mizoram sawrkarin tha taka a thlawp a vanga lawmawm a tih thu a sawi a. Aizawl Judicial District bakah district danga Court building leh hmunhma siam mek chungchang leh thlenchin tlangpui te a tarlang. Justice Nelson Sailo chuan High Court Building thar Aizawl khawpui lailiah sawn a nih chungchangah Mizoram sawrkar chungah lawm thu a sawi a. High Court Building thar hi Court dawrtu tan bakah Jugde leh a thawktute tan pan a awlsam sawt tawh dawn a ni a ti.
Gauhati High Court lo din dan leh hmasawnna te a sawi a. Tunah hian Mizoramah advocate kumtiamin an pung zel a, kumtin lawyer 50 velin BAR an rawn zawm deuh ziah tawh tih a sawi a ni. Justice Nelson Sailo chuan Court huangah ringawt danhremite awm a hun tawh lova, ram rorelna leh ram dana mipui aiawha dan siamna huang – legislature lamah te pawh danhremite chuan tel ve an tum tur a ni a. Danhremite chu mipui tana dan tha leh hamthatna siam kawngah a zir a zir chhuak an nih angin an tel ta,m deuh deuh a ngai a ni a ti. Tunlaia Information Communication technology hmasawnna nasa tak chu Court hnathawhah te pawh hman tangkai tumin eCourts Mission Mode Project kalpui a ni a ti a. He project a hmalakna kal mek leh thlen a thlen chin te a sawi bawk a ni.
Pu C. Lalramzauva, Senior Advocate, Adviser to Chief Minister chuan Lawyer te fuihna thu sawiin India ramah Mizorama Lawyer te leh Gauhati High Court hnuaia Lawyer te hi a tha ber tia sawi ni lo mahse India ram hmundanga lawyer te aia an rintlak lohna a awm lo a ni a ti. Gauhati High Court hnuaiah ukil leh Judge chhuanawm tak takt e – High Court leh Supreme Court judge a hlankai tawh te chungchang a sawi a. Heng mi chhuanawm te zingah hian Justice Ranjan Gogoi, Former Chief Justice of India pawh a tel a ni a ti. Pu C. Lalramzauva, Senior Advocate chuan ram rorelna khawl, dan siam leh policy siamtu zingah te Mizorama ukil te chu tel ve tum turin a fuih a. Hei hi Mizoram Judiciary in hmasawnna kawng a zawh dawn chuan hmachhawp pakhat a ni a ti.
April 5, 1948 khan tuna Gauhati High Court hi High Court of Assam tiin din a ni a. Sitting hmasa lam Shillong-ah neih thin a nih hnuiin August 14, 1948 khan Gauhati ah sawn a ni. Kum 1963 a Nagaland state a lo pian khan High Court of Assam & Nagaland tih a ni leh a. A hnu deuhah North Eastern Area(Reorganization), Act 1971 hnuaiah state 5 -Assam, Nagaland, Manipur, Meghalaya leh Tripura bakah UT 2 - Arunachal Pradesh leh Mizoram intawm turin Gauhati High Court tih a ni a. February 20, 1987 atangin state 7 - Assam, Nagaland, Manipur, Meghalaya ,Tripura, Arunachal Pradesh leh Mizoram ten an intawm ta a ni. NE state dang ten anmahni puala High Court an neih deuh vek tak hnuah tunah hian Assam, Mizoram leh Arunachal Pradesh ten an intawm mek a. Principal Seats Guwahati ah awmin Aizawl leh Itanagar-ah te Bench a awm mek bawk a ni. Aizawl Bench, Gauhati High Court hi July 5, 1990 khan din a ni a. Kum 2008 a Judiciary an indan atang khan Aizawl Bench, Gauhati High Court chuan Mizorama court zawng zawng leh tribunal kaihruai hna a thawk tan a ni.
Tunah hian Mizoramah Judicial District 3 – Aizawl District(Aizawl, Kolasib, Mamit leh Saitual), Lunglei District( Lunglei, Lawngtlai, Siaha leh Hnahthial) leh Champhai District( Champhai leh Khawzawl) a awm mek a ni.
Platinum Jubilee of Hon’ble Gauhati High Court lawmna hunah hian Mizoram State Sawrkar hotulute, Registry of Gauhati High Court, Aizawl Bench hotute, Mizoram Judicial Service a Senior Officer te, Mizoram Bar Association a member senior leh sawmbik te an tel a. Mizoram sawrkar aiawhin Pu H.Rammawi, Vice Chairman, Mizoram State Planning Board, Pu Lalsawta, Chairperson, Mizoram Lokayukta, Pu Lala Khobung, Chairman, Mizoram State Law Commission, Dr Renu Sharma, Chief Secretary, Pu Devesh Chandra Srivastava, Director General of Police, Pu H.Lalengmawia, Commissioner & Secretary, Home Department, Pi Helen Dawngliani, Secretary, Law and Judicial Department leh sawrkar hotulu engemaw zat an tel a. MJS lam atangin Pu Vanlalenmawia, District & Sessions Judge, Aizawl, Dr. HTC. Lalrinchhana, Judge, Special Court, PC Act, Pu Thanglianmanga Guite, District & Sessions, Lunglei, Pi R. Vanlalchami, Presiding Officer, MACT, Pi R. Lalduhawmi, Judge, Special Court, ND & PS Act leh Senior judge engemaw zat, Mizoram Bar Association lam atangin President, Mizoram Bar Association leh a thawhpuite bakah senior advocate engemaw zat an tel a. Mizoram Law College lam atangin Principal leh zirlai thahnem tak an rawn tel bawk a ni.
Joel Joseph Denga, Registrar, Gauhati High Court, Aizawl Bench chuan lawmthu sawiin Seminar Programme hi a khar a ni.
Attachment
- Loading attachment...
