48/2023-2024

Dated Serchhip, the 5th April, 2023: Vawiin khan Baktawng khawtlang chuan Tuikum bialtu MLA Er. Lalrinawma, Cabinet Minister leh an khaw pa ni bawk chawimawina hun Baktawng Dawrkawnah khawtlang huapin an buatsaih.

He hunah hian Er.Lalrinawma chuan thusawiin a pian leh seilenna khuain ropui taka an chawimawi chu a lawm tak zet tih sawiin, a naupan lai ata khawtlangin an chhungkua an lo chhawmdawl tawhna tinrengah pawh lawmthu a sawi a ni. Tun dinhmun a thlen theih na chhan chu hmangaih taka tawngtai sak thintu leh bial mipuite duhsakna a dawn thin vang a ni tih sawiin, vawiin thleng tura Pathian hruaina leh bial mipuite duhsakna chu a theihnghilh ngai dawn lo tih a tarlang a ni. Chawimawina hi mi hlawhtlingte chan thin a ni a, vawiina naupang rawn kalte pawh hetiang chawimawina dinhmun ropui tak hi an dawng ve thei tih inhriaa an thiltihna kawng tinrengah theih tawp chhuah turin a chah a, duhsakna a hlan a ni.

He hunah hian Pu K. Lalrampara VC member chuan khawtlang aiawhin thu a sawi a, Er. Lalrinawma, Cabinet Ministera hlangkaitu Pu Zoramthanga kaihruai sawrkar chungah lawmthu sawiin, Baktawng chhulchhuak Mizoram rorelna hmun sang bera a thu hi ropui kan ti a ni. Amah Er. Lalrinawma'n Tuikum bial mipui a enkawl dan leh kan duh leh mamawh min tih sak dante mipuiin kan hre vek a, kan lung a awi hlein ka hria a, helai bial pa nih a tlin hleah kan ngai a ni. Kan khawtlang hian kan chhuang hle a, a kal zelna turah duhsakna an hlan a ni, a ti.

Lawmna inkhawm neih zawh hian Minister hian MLA fund hmanga siam Futsal Ground hawnna hun a nei nghal a ni.

Vawiin Er. Lalrinawma chawimawi a Programme hi Pu Fx Lalthianghlima, Vice President Village Council in a kaihruai a. Pi Zodingpuii, IAS Director, Social Welfare & Tribal  Affairs Department, Dr. Lalrinpuii Sailo, Director, AH & Vety Department, Pu V. Zothansanga, Director, Sericulture Department, Pu H. Darhmingthanga, Asst. Commissioner, Excise & Narcotic Department, Serchhip  leh offcial thahnem takin an tawiawm a ni.