49/2023-2024

Aizawl Dated The 5th April 2023 : Vawiin khan Pu H.Rammawi, Vice Chairman, State Planning Board, State Planning Board member-te leh Research Officer, Planning & Programme Implementation Department te chuan West Serzawl rama Oil Palm Seed Garden chu a hmunah an tlawh a.Hmalak mek dan enin, hmalakna tura hmachhawp te Agriculture Director leh a enkawltu Officer-te an sawipui.

Pu H.Rammawi chuan Oil Palm hlawk zia hriain,Mizoram sawrkar chuan 'Oil Palm Act 2014' a lo siam tawh a ni, a ti a.Mizoram chu ruahtui tlak thatna hmun anih avangin a hranpa a tui pek ngai lovin Oil Palm-chu awlsam zawk a chin theih anih thu a tarlang a.Oil palm chu a hmanna hrang hrang a tam avangin kum khat ah a man (price) vawi hnih tal a pung thin a,hei hi a chingtute tan thil lawmawm tak anih thu a tarlang bawk a ni.India ram in thlatin oil palm 63 lakh tons chu ramdang atanga a lakluh thin thu sawiin,hei hian India ramah tharchhuah ala tam tawk loh zia atarlang a, Mizoram ah tharchhuah tam anih chuan state pawnah hralhna tur tam tak a awm tih a chiang hle a ni, a ti. India sawrkar in oil palm chin nan hmarchhak states-tan cheng vaibelchhe nuaikhat a dah thu tarlangin, Mizoram pawhin sum tam zawk a hmuh theih nan sawrkarin hma a lak zel thu a sawi a ni.

Vice Chairman leh State Planning Board member te chuan Agriculture Department-in Oil Palm chi tha siam chhuahna tur a buatsaih leh enkawl dan chu a tha an ti hle a, Mizoram tana sum hmuhna tur leh thil hlu tak a nih dawn avangin tha thlah lova enkawl chhunzawm zel turin thawktute an chah a, a hlawhtlin ngei theihnan duhsakna an hlan bawk a ni. State Planning Board hotute hian he Oil Palm chi siam chhuahna tur hi a hlawhtlin ngei theih nan Agriculture Department chu theih tawp chhuahpui an inhuam thu an sawi bawk.

Agriculture Department hotute sawi danin West Serzawl-a Oil Palm Seed Garden hi kum 2014 atanga buatsaih tan a ni a. Indian Council of Agriculture Research (ICAR) hnuaia Indian Institute of Oil Palm Research-in sum leh an thiamna hmanga an rawn dinpui a ni a. Ram Hectare 15 zetah Oil Palm chi tha bik, a chi thlah tur a Nu kung leh a Pa kung 2000 phun a ni a. Hemi atang hian a chi thlah tur bik a Nu kung leh a Pa kung thlan a ni ang a. Chungte chu inthlahpawlh tirin Oil Palm chi tha siam chhuah a ni dawn a ni. Hemi atan hian Laboratory pawh sak tan mek a ni a. Oil Palm hi thlai danglam deuh a nih avangin a rah apiang a chi atana hman mai chi a ni lova. A hranpaa a chi tur siam ngai a ni. Kum 2025-26 atangin Oil Palm chi tha hi siam chhuah hman ngei tumin hma lak mek a ni.

West Serzawl-a Agriculture Department-in Oil Palm Seed Garden a buatsaih mek hi India Hmarchhakah a awm chhun a ni a. Heta tanga Oil Palm chi siam chhuah a nih hunah chuan India ram State dangin helai atang hian Oil Palm chi an rawn lei thin ang a, a hlawkna chu Mizoram sawrkar-in a tel dawn a ni. Oil Palm Scientist te chhut dan chuan Oil Palm chi hralhna manah hian kum khatah Cheng Nuai Zasawmnga (Rs. 150.00 lakh) chuang Mizoram-in kan hmu thei dawn a ni. Oil Palm chi-ah India ram kan la intodelh loh avangin India sorkar chuan a chi tha siam chhuah hi a ngaipawimawh hle a. He lama mithiam bik, Oil Palm Scientist te pawhin a hmunah rawn kalin hmalakna te an rawn enpui thin a ni.

Pu H.Rammawi, Vice Chairman, State Planning Board leh Planning Board Member- te hian Krishi Vigyan Kendra (KVK), Lengpui, Mamit District chu an tlawh haw nghal a, KVK-a thawktuten an lo dawngsawng a ni. Planning Board Vice Chairman leh Member-te hian KVK Laboratory hrang hrang te an enkual hnu ah sangha tihkeuh leh inthlahpunna hmun an tlawh nghal a; KVK-a thawktute inpekna leh thawhrimna chu fakawm an tih thu an sawi a ni. KVK-a thawktuten  harsatna hrang hrang an lo thlen te  chu Planning Vice Chairman leh Member-te hian puih an nih tur thu an sawi bawk a ni.