50/2023-2024

Kolasib dated 5th April 2023: Vawiin khan Kolasib Stadium, Project vengah Mizoram Inter District Junior Boys Football Championship 2023 hmawrbawkna hun neih niin Lawngtlai leh Saitual district-te an intum a. Lawmgtlai team-te chuan 2 - 1 in hnehna an chang a ni. A kharna inkhawm hi Pu K.Lalrinliana, Minister leh Chairman, Organising Committee ni bawk chuan a kaihruai a, Pu K.Laldawngliana, MLA, Serlui Assembly Constituency chu Khuallian niin Pu Laltlanmawia, President, KDFA chuan lawmman semna hun a hmang bawk a ni.

Khuallian Pu K.Laldawngliana, MLA chuan Mizoram district 11 atanga infiammi kalkhawmten inelna felfai leh thianghlim hmanga Inter District Junior Football Championship 2023 an hmang chu lawmawm a tih thu sawiin chak zawk ten lawm dan tawk an thiam bakah chak lo zawk ten lungawi tak a dawnsawn dan an thiam chu infiammi hlawhtling ni tura neih ngei ngai, mahni inthunun theihna lantirna a nih thu a sawi a. Mizoram hmun hrang hranga thalaiten infiamna hmanga an thiamna leh theihna an haichhuah theih nan Sawrkarin hma a la mek thu leh Sport Policy mumal taka duan a nih thu a tarlang a, infiammite tan hamțhatna hrang hrang siam a nih thu a sawi. Infiamna leh zirna a hlawhtlinna chang tur chuan taimakna leh tumruhna neih a pawimawh thu Pu K.Laldawngliana chuan sawiin ruihtheihthil a fihlim tur leh rilru leh taksa hrisel nei tura insumtheihna leh mahni inthunun theihna vawng nung tlat turin infiammi kalkhawmte chu a chah a ni.

Mizoram Inter District Junior Boys Football Championship 2023, Kolasib hi Regional Sports Training Centre, Saidan leh Kolasib Staduim, Project vengah March ni 28 chawhma atang a kalpui țan niin District tin aiawh Team 11 ten ni 28, March atanga ni 5, April 2023 thleng hian match 18 kaltlangin inelna an nei a ni. Championship chhung a mimal leh team lawmman chu hetiang hian sem a ni;
1. Best player: Ricky Vanlalhriatsanga, Lawngtlai
2. Top scorer: Isaac Lalruatfela, Saitual
3. Fair Play: Saiha Team
4. Champion team leh Runner up team te hian trophy leh certificate an dawng a ni.

Attachment

  • Loading attachment...