Khawtlang inrelbawlna tihchangtlun nana 13th Finance Commission Grant 2011-2012 hmingin tukin zingkar khan LAD Minister Pu P.C.Lalthanliana chuan Kolasib, Serchhip leh Mamit District-a Village Council hrang hrangte hnena pek tur Steel Almirah truck trip 3 chu DLAO Office, Ramhlun North atangin a vailiam.

LAD hian Finance Commission atangin Rural Local Bodies Grant an dawng thin a, heng tanpuina sum te hi Mizoram khawtin Village Council te hnenah an sem thin a ni. Heng sum te hi Village Council House, Footpath, Retaining Wall, Footsteps, Bridges, Thlanmual pana kawng siam nan te, Village Park / Recreational Centre, Community Auditorium leh Solar Street Light siam nante-a hman tura ruahman a ni. Heng bakah hian Village Council te mamawh leina tur ruahman a ni bawk a, tun tumah pawh hian Village Council ten lehkha pawimawh te an vawn that nan Steel Almirah sem chhuah tan a ni a, vawiin hian Kolasib, Serchhip leh Mamit District te tan semchhuah a ni. Kum 2010-2011 leh 2011-2012 chhunga 13th Finance Commission Grant atanga Aizawl, Lunglei, Champhai, Serchhip, Kolasib, Mamit District te leh MADC, LADC leh CADC te hnena sum pekchhuah tawh zawng zawng chu Rs. 29,58,77,800 /- lai a tling tawh a ni.

Tukin zinga V/C te pek tur Steel Almirah thlah liamna programme hmanah hian Minister chuan Village Council te pawimawhna leh mawhphurhna sanzia te hriain Sorkar chuan V/C chak zawka kalpui theih nan hma a la mek a, kawng hrang hrangin a thuam changtlung zel a ni, a ti. 13th Finance Commission atanga sum hmuh chu a tam tham a, khawtlang hruaituten an sum dawnte dik taka an hman chuan khawtlang hmasawnna leh hlawkpuina tham a tling a ni, a ti bawk. Tanpuina sum an dawn thin te chu Minister chuan khawtin V/C te chu tha taka khawtlang enkawl nan hmang turin a chah bawk.