No.3199/2021-2022
Aizawl dated 29th November 2021: Vawiin khan Pu.K.Lalrinliana, Local Administration Department Minister, Kolasib Assembly constituency bialtu MLA ni bawk chuan Mizo Students' Union buatsaih 'Zirlai tițhate lawmpuina' hun Pangbalkawn leh Meidumah a hmanpui a. Local Administration Department hnuai a 15th Finance Commission leh Mizoram Finance Commission kaltlanga hnathawhte a endik nghal a ni.
Minister Pu K.Lalrinliana chuan zirlai tițha lawmpuina buatsaih a nih hian zirna chawimawina a nih tel thu a sawi a, naupang tițhate mai piah lamah hlawhtlinna an chan theih nana nu leh pate inpekna chawimawi a nih thu a sawi bawk a ni. Pu K.Lalrinliana chuan zirna a hlawhtlingte chawimawi an nih hian naupang dangteah chona a tuh țhin thu leh chawimawina dawngte tan pawh hlawhtlinna nasa zawk an chan chhunzawm zel theih nan phurna a siam bawk thu a sawi a. Zirna hi ram hmasawnna hmahruai a nih angin ram hmasawnna tur zirna awmze nei leh thiamna hmantlak an zirchhuah theih nan uluk tak a ngaihtuahna seng turin zirlaite leh zirtirtute chu a chah bawk a ni. Minister chuan zirlaite tuina leh thiamthil neihte haichhuahna kawngah zirtirtuten mawhphurna nasa tak an neih thu sawiin ram leilung hausakna haichhuahna kawnga thiamna nei a, intodelh tumna nen zirna kalpui a pawimawh thu a sawi.
Pangbalkawnah hian HSLC zirlai 8 leh HSSLC zirlai 2-te hnenah lawmpuina thuziak hlan a ni a, Meidumah hian M.A zirchhuak thar 2 leh B.A zirchhuak thar 2-te hnenah hlan a ni bawk a ni.
Zirlai tițha lawmpuina hunah hian VC, YMA leh MSU aiawh ațangin zirlaite fuihna thu ngaihthlak a ni a, Pangbalkawn leh Meidum huam chhunga school zirtirtute leh NGO hrang hrang hruaitute an tel a ni. Vawiin vek hian Pu K.Lalrinliana kaihhruaina hnuaiah Bairabi khawtlang hruaitute, NGO hrang hrang aiawhte leh Kolasib district-a Sawrkar department hotu țhenkhatten Bairabi PWD IB-ah țhutkhawmna an nei a. Bairabi chu Mizoram luhka pawimawh tak pakhat a nih angin Sawrkar ina kawng hrang hranga ruahmanna kalpui a tum dan sawihona hun neih a ni a. He hunah hian Pi Margaret Lalramchhani, IFS, DFO, Pu H.Lalsiamliana, E.E, PHE, Pu T.Lalnunsanga, E.E National Highway Division III, Pu ST Lalhmingmawia, DLAO, Pu Lalhmuakliana, DCSO leh Pu Hmingthanzuala, DIPRO te an tel a ni.
Attachment
- Loading attachment...
