No.3198/2021-2022

Aizawl Sahmulphah thla ni 29, 2021: Vawiin khan Lawngtlai Bawrhsap Dr Andrew H. Vanlaldika chuan Lawngtlai Chief Medical Officer office a tlawh a. An dinhmun leh mamawhte a hmunah a enfiah.

Bawrhsap hi Additional Deputy Commissioner Pu James Miahlung leh DIPRO Pu C. Lalhruaitluanga te'n tawiawmin, CMO Dr LP Malsawma hovin thawktute'n an lo dawngsawng a. Office inrelbawl dan leh health programme hrang hrang kalpui dan bakah, COVID-19 test leh vaccination kalpui dan te sawi hovin, harsatna hrang hrang leh a chin fel dan turte an en ho va. Hmasawnna tur hrang hrang leh chak leh felfai zawka hna kalpui dan turte sawi ho a ni bawk.

Lawngtlai District chhunga COVID-19 hri danna pek chu ngawrh taka kalpui chhoh mek a ni a. Tun dinhmunah Lawngtlai District chhunga mi 65,145 chuan first dose la tawhin, second dose la tawh mi 33,225 an awm a. Lawngtlai District target atanga kum 18 chung lam, vaccine la thei tura ngaih mi 82,359-ah vaccine lak hmabak mi 17,214 an la awm a, vaccine la tawh hi za zelah mi 79.1 ang a ni.

Attachment

  • Loading attachment...