3189/2023-2024

Champhai, the 28th December, 2023: Local Adminstration Department (LAD) changtu Minister Pu C. Lalsawivunga chuan vawiin khan Saikhumphai Road hnathawh mek chu a hmunah kalin a enfiah.

LAD Minister Pu C. Lalsawivunga chuan Vaphai atanga Saikhumphai panna kawng siam mek chu ram rotling ni ngei tura thawh a nih theih nan uluk taka vil a nih tur thu leh mipui tana chhenfâkawm tak a nih theih nan tha taka thawh a nih ngei a beisei thu a sawi a. Ramri a inkalpawhna tur kawng pawimawh tak a nih dawn avang leh zin veivak mai bakah bungraw phur lirthei lian tak tak pawhin an zawh a la ngaih dâwn thu tarlangin, fur ruahtuiin a tihbuai hmaa zawh hman a nih theih nan a rang lama hnathawh chhunzawm a ngai a ni, a ti bawk.

Pu C. Lalsawivunga chuan Mizoram ram zimtea kawng neihte mumal leh tha zawka enkawl a tul thu a sawi a. A bikin ramri hnaiha kawngte uluk tak leh tha taka enkawl a ngaih thu sawiin, a kaihhnawih Minister bakah kan zavaia tangruala ram rotling tur kawng tha kan neih theihna turin a enkawl kawngah mipuite pawh sawrkarin thawhpuiah a sawm thu a sawi bawk.