3190/2023-2024

Aizawl, the 28th December 2023 : Sports & Youth Services Minister Pu Lalnghinglova Hmar chu vawiin khan Maj. Gen. Gagan Deep, Additional Director General NCC North Eastern Region leh NCC hotute dangten a pisa ah hmuin, Mizo thalaite tan NCC kaltlanga huap zau zawka hmalak dan an sawiho.

Sports Minister Pu Lalnghinglova Hmar chuan NCC chu thalaite tan thil tha tak mai, mahni inrintawka, mahni inthununna leh nun kaihhruaina tha inzirtirna a ni tiin NCC chu Mizo thalai ten an tangkaipui hle thin nia a hmuh thu NCC hotupa hi a hrilh a. Ruihtheih thil laka thalaite an fihlim theih nan leh nun kawng dik an zawh theih nan NCC chu thalaite tan hmanraw tha leh pawimawh tak nia a hriat thu Minister chuan a sawi a. NCC kaltlanga Mizo thalaite sipai officer ah an lut thin chu lawmawm a tih thu sawiin, hei aia tam zawk an luh thei dan kawng dappui turin NCC hotupa hi a ngen bawk a ni.