1759/2023-2024

Aizawl, the 5th September, 2023: Cheng nuai 600 senga sak Local Administration Department (LAD) Directorate Building thar, Mizoram New Capital Complex (MINECO) ami chu vawiin chawhma dar 11 khan LAD Minister Pu K.Lalrinliana'n khuallian niin a hawng.

Khuallian LAD Minister Pu K.Lalrinliana chuan LAD Directorate Building tha tak neih a nih theih nana thahnemngai taka tha thawhtute fakawm a tih thu sawiin, Office building thar chuan ram leh mipui rawngbawl sak kawngah tih takzetna, Pathian hre reng chunga thawk tura inpekna thar siam se a duh thu a sawi a. DLAO Aizawl Office pawh Directorate kiang maiah SASCI sum hmanga sak a nih theih nana hmalak a nih thu leh Directorate Conference Hall changtlung tak vertical extension hmanga siam tura ruahmanna neih a nih thu a sawi a. LAD hnuaia thawktute'n indaihlohna leh duhkhawp hmanraw neih lohte chhuanlam atana siam lova theihtawp chhuaha mawhphurhnate an hlen thin chu ropui tiin, VC hrang hrang huam chhunga hmasawnna ruhrel siam kawnga fund neih ang angte tangkai taka hman a ni thin chu fakawm a tih thu a sawi bawk.

Pu K.Lalrinliana chuan Village Council-te enkawl leh zirtirna pek kawngah te, tualchhung inrelbawlna leh hmasawnna ruhrel siam bakah, VC area a chengte'n eizawnna ngelnghet an neih theih nan Local Administration Department-in Rashtriya Gram Swaraj Abhiyan (RGSA) leh hmalak theihna ang angte kaltlangin theihtawp chhuaha hna a thawh thin thu a sawi a. Tun dinhmunah VC 243 te Computer pek an nih tawh thu sawiin, Handloom Design Training cum Production Centre Thenzawlah hawn mai theiha siam a nih thu te, Rural Homestay & Agro Tourism Tuipui Darzokaiah siam a nih thu te, Kolasib District-ah kuhva kawr atanga plate siamna din a nih thu te a sawi a. VC House engemawzah siam a nih bakah SIRD nena tangkawpin District-ahte District Panchayat Resource Centre (DPRC) sak a ni a, a la awm lohnaahte pawh sak thuai tum a ni tiin, Training Centre bakah Hostel sak tel tum a ni, a ti a. VC House leh Common Service Centre tam zawk sak tum a nih thu leh LAD Park engemawzah enkawltu dang kuta hlan a nih thu te, Leng khuaah Solar Harvesting Project leh Bairabi-ah Truck Terminal leh Chawlhna Tui Kam siam tura hmachhawp neih a nih thu a tarlang bawk.

He hun hmanpuitu Pu K.Laldawngliana, MLA, Vice Chairman, Commerce & Industrial Development Board chuan Department pawimawh tak Local Administration Department-in Directorate Building tha tak a nei thar chu a lawmpui thu sawiin, thawktute chu rilru thar nena midangte tana malsawmna ni turin duhsakna a hlan bawk.

He hun hi Pi Teresy Vanlalhruaii, Secretary, LAD chuan kaihruaiin, Rev. Remlalfaka'n hunserh a hmang a. Pu P.C Lalrinawma, Development Engineer, LAD hnen atangin technical report ngaihthlak a ni a. Pi Rita Lalnunmawii Pachuau, Director, LAD chuan lawmthu sawiin hun hman a khar a ni.

LAD Directorate Building thar hi December ni 15, 2019 atanga sak tan niin July 2023 ah luahluh a ni a. A sak hna hi Zothan Consultancy Services, Luangmual, Aizawl te'n an thawk a. A dung feet 83.10 leh a vang feet 46 niin, a len zawng hi Square feet 23,234.76 a zau niin, zopa chhiara chhawng 5 a ni.