1386/2024-2025

AIZAWL; the 31^st July, 2024: Vawiin chhun dar 12:00 (Noon) khan LAD Minister Pu C.Lalsawivunga Officer chamber-ah Village Council 88-te hnena Computer Set semna programme hman a ni a. Programme  hi Pu Chuauhnuna, Director, LAD in kaihhruaiin, Pu Lalchawimawia, Jt. Director (P), LAD in report a pe.

LAD Minister chuan thu sawiin, vawiinah hian VC 88 hnenah Computer set pakhat theuh sem tur a ni a, VC 88 te inkohkhawm a hautak avangin, VC 88-te aiawh atan Sumsuih leh Nisapui VC te hnenah  computer set hi kan sem ta zawk a ni. Computer kan sem te hi Rashtriya Gram Swaraj Abhiyan (RGSA) Scheme hnuaia mi niin; Ministry of Panchayati Raj kaltlanga dawn a ni a. Mizoram tana RSGA Nodal Department chu Local Administration Department a ni. RGSA Scheme hian a tum ber chu tualchhungah Sustainable Development Goals (SDGs) an tihhlawhtlin theihna tura Village Council-te tihchak leh thuamchak a ni a. Training chi hrang hrang hmanga VC te hriatna leh thiamna tihhmasawn te, khawtlang rorelna leh inrelbawlna hmunpui an neihna tur atana Panchayat Bhawan (VC House) pek te, tualchhung mipui te tana tangkai zawk leh awlsam zawka rawng an bawl theih nan Computer leh Common Service Centre VC te hnena pek te hi RGSA Scheme hian a tum a ni, a ti.

Pu Sawivunga chuan Village Council member te  fuihna thu sawiin, VC member te hi mipui kaltlanga Pathianin khawtlang inrelbawlna-a a fawng vuantu tura a ruat te in ni a. Rinawm tak leh taimak takin thawk ula, in rinawmna chu Pathian hnenah rinawmna ni rawh se, Pathian hnena kan rinawmna hian rinawmna dang dang a huam vek a ni. Hleih neih miah lova khawtlang rorelna kalpui te hi Pathian hnenah rinawmna chuan a huam vek a ni. Vawiina Computer set tha tak in dawn hian khawtlang rawng inbawlna kawnga IT (Information Technology) kaihhnawih thilah nasa takin a pui dawn che u a, kawng hrang hranga VC mawhphurhna inhlenna tur kawngah pawh in hman tangkai zel theih nan duhsakna ka hlan che u a ni, a ti. Minister chuan VC inrelbawlna Dân thar duangin, consultation neih mek a ni a, VC inthlan leh hunah chuan VC dân thar hnuaiah kan inthlan theih pawh kan beisei hle a ni. Panchyat Bhawan pawh  kuminah a tam thei ang bera sak tum a ni, a ti bawk. 

Pu Lalchawimawia, Jt.Director, LAD chuan report peiin, RGSA hnuaiah hian nikumah khan Computer set 261 lo semchhuah tawh a ni a, kumina 88 kan sem  nen chuan a vaiin 349 kan semchhuak tawh a ni. Vawiina kan computer set sem te hi Government e Marketplace (GeM) kaltlang veka lei an ni a. Computer brand tha leh lar tak ECER a ni a, VC ten Computer configuration tha tak an dawng theih tur hi LAD Dept. pawh kan lawm hle a ni.  RGSA Scheme hian Mizoram chhunga Village Council zawng zawng Autonomous District Council area a mite nen a huam vek a. VC zawng zawngin Computer an neih vek theih nan Sawrkar chuan theihtawpin hma a la mek a ni, a ti.