1385/2024-2025
2024 Vawkhniahzawn thla ni 31: Vawiin khan Lunglei District Legal Services Authority (DLSA) leh Deputy Commissioner office ṭang kawp huaihawtin Convention Centre, Lungleiah Lungleia sawrkar office hotu lu (head of office)-te leh staff-te tan India rama dan thar pathum hman tharte zir hona, 'Training on New Criminal Laws' buatsaih a ni.
He hunah hian Lunglei District & Sessions Judge Pu Vanlalenmawia chu Khuallian a ni a. Dan pawimawhzia a sawinaah, Pathianin thil siamte khawsak dan tur duangin, an zawm tur dan a siam a, tih tur leh tih loh tur a tuksak tih sawiin, Bible-in roreltute thu zawm tura min tih angin dan hriat a, zawm a, pawisak hi a Pathian thu hle a ni, a ti a. Mihring tan dan tel lova nun ho theih a ni lo tiin, dan zawm chu zalenna a nih thu a sawi a. Dan zawm tur chuan dan hriat a ngaih thu sawiin, sawrkar official kal khawmte chu dan thar chungchang an zir turte uluk taka zir tura chahin, duhsakna a hlan a ni.
He hun hi Lunglei District Additional Deputy Commissioner Pu James Miahlung chuan a kaihruai a. Resource person pahnih, Lunglei Chief Judicial Magistrate & DLSA Secretary Pi Lalthansiami Hnamte leh Lunglei District Superintendent of Police Pu J. Lalmuankima te'n dan thar pathum - Bharatiya Nyaya Sanhita, 2023 (BNS); Bharatiya Nagarik Suraksha Sanhita, 2023 (BNSS) leh Bharatiya Sakshya Adhiniyam, 2023 (BSA) chungchanga hriat tur pawimawh hrang hrang an zirtir a. Zawhna leh chhanna leh sawi hona hun hman a ni bawk.
He hunah hian NCD chungchang zir hona hun buatsaih nghal niin, Hrangchalkawn Urban PHC-a Medical Officer Dr VL Hrechianga'n natna inkai chhawn theih loh, kan awm dan leh nunphung avanga keimahni kan insiam chawp, a veitu tana natna hlauhawm tak ni si, non-communicable disease (NCD), he'ng - zunthlum, BP sang, cancer, etc. chungchang leh vei lo tura nunphung uluk leh inven dan tur te a sawi a. Public Prosecutor Pu Malsawmdawngliana'n lawm thu sawiin hun a khar a ni.
India ram dan thar pathum - BNS, BNSS leh BSA te hi Indian Penal Code, 1860 (IPC); Code of Criminal Procedure, 1973 (CrPC) leh Indian Evidence Act, 1872 te thlaktu niin, July ni 1, 2024 aṭang khan hman ṭan a ni.
Attachment
- Loading attachment...
