Vawiin chawhma dar 11:00 a.m khan Lawngtlai DC Office chamber ah Bawrhsap Pu J. Hmingthanmawia chuan Lai Autonomous District Council 10 na Chairman-Protem atan Vawmbuk MDC bial atanga thlan tlin Pu T. Zakunga chu rinawmna thu tiam tirin a la lut a, chawhnu dar 1:00 p.m khan LADC Conference Hall ah Chief Executive Member atana thlan Pu VL Hmuaka, Vengpui MDC bial atanga thlan tlin chu rinawmna thu tiam tirin a la lut bawk.

Protem Chairman atana Pu T. Zakunga lakluhna inkhawm hi Pu K. Lalramliana, Legislative Secretary, LADC chuan a kaihruai a, LADC CCB Sub Rules 8 rule No. 13 na in a phut anga Chairman Protem hi lakluh a nih thu a sawi a ni. Chief Executive Member thar lakluhna inkhawm hi LADC Conference Hall ah neih niin, LADC Executive Secretary Pu Lalramenga'n a kaihruai thung a, Lawngtlai West bialtu MLA, Pu C. Ngunlianchunga, Minister of State, Mizoram ni bawk leh Lawngtlai East bialtu MLA, Pu H. Zothangliana, Parliamentary Secretary ni bawk te bakah mi pawimawh engemawzat inkhawmah hian an tel a ni.

Chief Executive Member atana lakluh a nih hnu hian Pu VL Hmuaka hian a thawhpui Executive Member tur mi pathum te hming a puang nghal a, chung te chu; Pu C. Lalneihkhuma, Vathuampui MDC bial atanga thlan tlin leh Congress Legislature Party a Deputy Leader ni bawk te, Pu Lallawmsanga Apetow, Sekulh MDC bial atanga thlan tlin leh Pu H. Chhuanawma, College Veng MDC bial atanga thlan tlin te an ni a, a dangte chu hun hrana puan an nih tur thu a sawi a ni.

Pu VL Hmuaka hian an sawrkar chhunga an ngaihpawimawh bik tur te chu, dan siamthat ngaite siam that te, Kaladan HEP Power Mw 460 pechhuak thei tur ruahmanna, Compensation vanga hnathawh hleih theihlohva awm reng sutkiante, mirethei ram nei lote ram ngaihtuah sakte, Truck Terminal sak te, NLUP tha taka kalpui zel te leh Lawngtlai khawpui tana thlanmual intawm siamte an nih tur thu a sawi a ni.