Vawiin khan NABARD bultumin World Vision chuan DRDA Conference Hall, Lunglei-ah Lunglei District chhunga Women Self Help Group-te tan Ar leh Vawk vulh dan Training an buatsaih.

World Vision-a Project Co-Ordinator & Co-Ordinator Development Facilitation Lunglei Dist. Women SHG Project, Pu Thanglunpaua Guite chuan training hawnna inkhawm kaihruai a, an hmalakna hrang hrangte leh Training chhimtute hriattur pawimawh thil a tarlang. Sorkar laipuiin hmeichhiate tan bika hamthatna a ruahman mek hi a lawmawm hle a, chutih laiin mi thenkhatin Bank atanga Loan an pukte hi rulh leh ngai lo leh tul lo ang hiala ngaihna rilru an nei thin chu a pawi hle a, Loan a nih angin rulh leh nachang kan hre ngei ngei tur a ni tiin trainees te a hrilh. Pu Rokunga Chhakchhuak, Dist. Development Manager, NABARD Lunglei pawhin thu sawiin Lunglei District chhungah hmeichhiate tan ei leh bara intodelh nan a bul tanna a ni tih a sawi a.

Lunglei District hi Arsa leh Vawksa-a intodelh tir tum a ni a, Loan lak te a hun taka rul turin a chah bawk. Dr. C. Lalthankhumi, Manager, District Poultry Farm chuan Ar vulh dan zirtir na hun a hmang a, Dr. Ngurzidingi Sailo, Dist. Vety Hospital-in Vawk vulh dan zirtirna hun a hmang thung. Lunglei District Women Self Help Group Project hi World Vision India, Chhimtuipui programme chuan ni 29th November 2012 atangin Lunglei District pumpuiah a kalpui tan a, Mizoram Rural Bank leh State Bank of India te nen thawk hoin tunah kum 3 a tling tawh a ni. He Project hi India rama District hnufual bik hrang hrangah kalpui mek a ni a, a tum ber chu hmeichhiate chawikan a, anmahni kaltlanga chhungkaw tan eizawnna ngelnghet siam leh retheihna umbo a ni. He Project hi Ministry of Finance, Government of India chuan NABARD kaltlanga a rawn bultum vek a ni.

Tun dinhmunah World Vision enkawlna hnuaiah Lunglei District chhungah Women Self Help Group 871 an awm mek a, heng zinga Self Help Group 125 te hnenah Mizoram Rural Bank kaltlangin zaa 7 percent pung awm lekin Loan Rs. 69,40,000/- pekchhuah tawh a ni a. Heng SHG te hian ar vulh, vawk vulh, puantah, puanthui, sumdawnna tenau, mombati siam, Bhujia siam leh Group chhunga peipun tura inpuktir (internal lending) hmangin bul an tan mek tawh a ni. World Vision hi Kristian pawl (NGO) niin Dr.Robert Bod Pierce-a’n kum 1950-a a din a ni a. World Vision hian rawngbawlnaa ngaiin mipui tan zirna kawngahte, hriselna kawngah te, ei leh bar zawnna kawngahte leh naupang harsa tanpuina kawngahte nasa takin hna a thawk mek a.

World Vision hi naupangte hmakhua ngai bika hmasawnna kawnga hnathawktu a ni a, naupangte dikna chanvo an neih theihna turin eng hnam leh sakhua bia pawh enhranna leh thliar hranna awm miah lovin tanpui hna a thawk a ni. Khawvel puma World Vison hmunpui hi USA-ah niin India ramah chuan Chennai-ah a ni.

Attachment

  • Loading attachment...