Khawvel puma kum 1988 atanga hman thin, World Aids Day 2015 chu vawiin khan Lal Thanhawla Auditorium, Treasury Square ah Mizoram State Aids Control Society buatsaihnain hman a ni a, Chief Minister Pu Lal Thanhawla chu khuallian a ni. Thupuiah ‘Getting to Zero’ tih thlan a ni a, hei hian HIV kai thar awm lohna, HIV veite endawng lohna leh Aids vanga thihna awm lohna tihna lam a ni.

Chief Minister chuan Aids veite kan thinhrikna te leh endawng thinna te chu tunah chuan a ziaawm tawh hle a, endawng an nih lohna turin inzirtirna kan uar hle a tul a ni a ti. Pu Hawla chuan Mizote hi hmelma a kan pawm mang loh min runtu hlauhawm tak tak a tam hle a ni tiin, Aids leh Cancer mai nilo, sum ngainatna te, duhamna te leh kuttling lova sum lak pawisak lohna te in min run nasa em em a ni a ti a. Heng min runtute hi kan zavaia tangrualin kan hneh angai a ni a ti. Mizoram hi India rama HIV positive tamna ber dawttu kan ni te hi a zahthlak a, a dona nasa taka kan kalpui a tul a ni a ti.

Chief Minister hian HIV Positive ni chunga HIV veite tanpui a, zirtirna pe thintu leh Aids dona kawnga khawvelin a pawm lawmman ‘Mary Robinson Awardee’ dawngtu Nula Lalchhuanzuali hnenah lawmpuina citation a hlan a. Pu Hawla chuan an mahni avangin mi tam tak an harhchhuak a, mi tangkai tak leh mi chhuanvawr an ni a ti. Chief Minister chuan World Aids Day hi harh tharna ni, chhanchhuah ngaite chhanchhuahna ni ah i hmang ang u tiin mipuite a sawm nghal a ni.

Khualzahawm Pu Lalsawta, Finance Minister chuan kan ram hi runin a awm mek a, kan hneh angai a ti a. Aids dotu bik awm mahse hneh tur chuan kan zavaia kan tan tlan a tul a ni a ti. Minister hian kum 2014-15 chhunga a thlawna thisen pe tha, category hrang hranga then a pawl anga thlan bik PUC NSS, Inter College Adventure Club, Chanmari Br.YMA, TKP Coordination, Aizawl leh CKTP te hnenah lawmpuina citation a hlan a. Midangte tana inpek hi thil harsa ber a ni tiin, thisen petute hnenah lawmthu a sawi a ni.

World Aids Day hmanna chhan berte chu Aids dona kawnga zirtirna uar taka pek a tul thu, a dona kawngah kan lungrual a ni tih lantirna te, HIV veite kan tuarpuiin kan thlawp reng a ni tih leh Aids vanga thite tawrhpuina leh hriatrengna atan a ni. Mizoramah MSACS din anih atanga hmang tan kan ni a. India hi khawvel pumah HIV positive tam lama pathumna a ni a, Mizoram hi India ramah HIV Positive tam berna dawttu kan ni. State lian zawkah te chuan Aids in tlem lam a pan laiin Mizoramah chuan a pung chho thung tih report a ni a, thingtlang leh khawpui a luh chhuah hneh hle nia hriat a ni.

Mizoramah kum 1990 October thla atanga kumin 2015 July thla thlenga HIV kai dan chu : Thisen test tawh zawng zawng : mi 3,24,918 an ni a, HIV Positive : 10,448 leh AIDS vanga thi zat : 1102 an ni. HIV kai chhanah mipat hmeichhiatna hman avanga kai an tam ber (69.31% ) a, Kum 25 - 34 inkar mi vei an tam ber bawk (42.02%).

Inkhawmah hian H & FW department Secretary Pu Lalhmingthanga’n kalkhawm te lawmna thu a sawi bawk a ni.