Vawiin khan Rural Development Department hnuaia Mizoram State Rural Livelihoods (MzSRLM) buatsaih Regional Saras Fair chu Rural Development Minister Pu R.Lalzirliana’n Assembly Annexe Conference Hall-ah a hawng.
December ni 11 thleng awh tur Saras Fair hawnna thu sawiin Minister chuan Self Help Group (SHG) kaltlanga rethei chhanchhuahna hi hmasawnna programme dangte angin vawi lehkhata lang duak thei ni lo mahse thuawihna nen, dawhthei leh taima taka bei tlattute chu an hlawhtling ngei ang, a ti. SHG hlawhtlinna lungthu pathumte chu tei rei peihna, taimakna leh pawl inlungrualna hmanga beih ngat ngatna a ni, a ti a, Mizote rilru tichhe fotu - a thlawna dawn beiseina chu SHG member-te’n an paih a ngai a ni, a ti. Minister chuan MzSRLM hnuaiah Serchhip leh Kolasib District bakah a tah tawla hma zauh chhoh zel tum niin kum 2022 hmaa Mizoram District zawng zawng tuam chhuah tumin ruahmanna siam a ni, a ti a. SHG kaltlang hian mi rethei chhungkaw tam takah hmasawnna ngelnghet thlen a beisei thu leh SHG member-te theihna hai chhuak tura Saras Fair buatsaih a ni chu lawmawm a tih thu RD Minister Pu R.Lalzirliana chuan a sawi a ni.
Minister hian Self Help Group SHG titha thlanchhuahte hnenah lawmman a hlan a. Chungte chu - Bilkhawthlir RD Block atangin Nu Tangrual Pawl SHG, Bilkhawthlir; Thingdawl RD Block atangin Alphonsa SHG,Thingdawl; Serchhip RD Block atangin Group VIII, Thenzawl leh East Lungdar RD Block atangin Hmeichhe Zo Handloom, East Lungdar te an ni.
He hun hmanpuitu Parliamentary Secretary Lt.Col (Rtd) Z.S.Zuala pawhin thu sawiin thingtlang kilkhawr zawk a miten an thil siam lakhawm a khawpui a zawrhna hun remchang siamsak an ni hi a tangkai hle dawn nia a hriat thu a sawi a. Ram a thang zel a, sawrkar hmalakna hrang hrang avangin hmun kilkhawr thlenga tlawhpawhtu kawngpui a lo awm tak chinah hian mahni thar chhuah leh siam chhuah thil hrang hrang awlsam zawka zawrh theih a lo ni ta hi a lawmawm hle, Parliamentary Secretary chuan a ti.
Saras Fair hi Assembly House Annexe Building hnuaiah neih niin Mizoram hmun hrang hrang atang leh rampawn atangin SHG ten dawr 70 chuang an hawng a ni.
MzSRLM hi Centrally Sponsored Scheme niin Ministry of Rural Development in kum 2010 khan SGSY hnuaia SHG kalpui thin chu a that tawk lohna tam tak siam thain National Rural Livelihoods Mission a din a, ram chhung state tinah SHG te enkawla vilzui chawt turin State Rural Livelihoods Mission din chhawng lehin Mizoram chuan RD Department hnuaiah kum 2011 khan Mizoram State Rural Livelihoods Mission a din a. Kum 2013, April ni 22 khan Mizoram Chief Minister Pu Lal Thanhawla’n hna thawk tan tak tak thei turin a hawng a ni.
He Mission in a tum ber chu thingtlang mi rethei chhungkaw tina hmeichhiate leh chhungkua a nu ber te, SHG hmanga chawikan a ni. He hna tanna atan hian Resource Block pali - East Lungdar, Serchhip, Thingdawl leh Bilkhawthlir RD Block te thlan phawt a ni a. Heng Block chhungah hian khaw 34 chu luh tawh niin a bak khaw dang la awm te pawh January 2016 atang hian luhtum a ni bawk.
Saras Fair hawnna inkhawm, RD Secretary Pu Lalhmingthanga kaihhruaiah hian Mizoram State Legistlative Assembly Deputy Speaker Pu R.Lalrinawma leh Govt.Deputy Chief Whip Pu RL Pianmawia bakah sawrkar mi pawimawhte leh SHG member engemawzat an tel a ni.
