Vawiin khan Autonomous District Council-te nena meeting tawp ber chu Raj Bhavan-ah neih leh a ni a. Mizoram Governor Pu Kummanam Rajasekharan chuan Lai Autonomous District Council (LADC) hotute nena meeting chu a kaihhruai a ni.

Governor Kummanam Rajsekharan chuan India danpuiin mipuite harsatna sukiang turin thuneihna sang tak min pe a ti a. Chung thuneihnate hmang chuan mi harsa berte dinhmun kan chawikan a ngai a ni, a ti. Hnathawhna tur sum kan hmuh te chuan a tum ram a thleng pha tur a ni tiin, hmasawnna hna hmanga an harsatna sutkian dan kan ruahman a pawimawh a ni, a ti. Council inrelbawlna mumal leh rualkhai taka mawhphurhna sem te, a hun taka report thehluh leh midangte ngaihdan lak te chu a pawimawh tiin, Council hruaitute chu an Council huamchhunga project thawh mekte chu neitu chanchanga a hmuna vil tur leh enfiah thin turin a chah a ni. Kum kaltaa an sum lakluh tum an tlin avanga a lawmpui thu sawiin, a aia tam an hmuh theih nana tang zel turin a chah bawk  a ni.  

Meeting-ah hian Council chhunga hnaruak hnawhkhah chungchang te, Lawngtlai Bypass Road te, higher secondary school leh college-a science zirna awm lo te, bawlhhlawh sawngbawlna, skill development, value addition, food processing leh thildang pawimawh te an sawiho a. Ramri hrula khaw 10 chuangte chuan vawiin thlenga kawlphetha an la hmuh lo thu leh Myanmar atanga raltlanten zirlai naupangte zirna a tih khaihlak thu tarlan a ni. 

CEM Pu T. Zakunga leh a thawhpuite chuan Governor chu Lawngtlai Greater Water Supply Scheme hawn a nih thuai theih nan leh NEEPCO-in 635 MW Chhimtuipui Hydro Electric Power Plant siam a tum chu chak zawka hmalakpui turin an ngen a ni.