Vawiin khan Kolasib Bawrhsap Dr.Arun T, IAS chuan Bilkhawthlir ah Rural Mart a hawng.

Bawrhsap chuan Rural Mart hawn theih ani chu lawmawm a tih thu sawiin Bilkhawthlir Farmer Producer Organization (FPO) member te thawhrimna chu a hriatpui thu sawiin an thawhrim rah an tel chho mek zel ani tiin theihtawp chhuah chhunzawn zel turin a chah bawk a ni. Hetih lai hian Burma Ram atanga kuhva rah chawk luh a tam avangin Bilkhawthlir a kuhva chingtuten kuhva rah hralhna kawnga harsatna an tawh pawh a hriatpui thu sawiin Sawrkara a thlen tawh thu leh hemi chungchanga harsatna sutkian dan tur ngaituahpui turin Champhai DC pawh hrilhhriat anih tawh thu a sawi bawk. Bawrhsap chuan Rural Mart hawn a nih theih nana hma latu pawimawh tak NABARD,Mizoram te chungah lawmthu a sawi a, mi thawkrim te hmalakna hriatpui a, khawtlang tana an luangchhuak chu thil entawn tlak tak anih thu a sawi bawk. 

NABARD,Mizoram General Manager Pu RK Srivastava chuan Bilkhawthlir kuthnathawkte chu a lawmpui thu sawiin kawng hrang hrangah tanpuina emaw zirtirna an mamawh anih chuan NABARD chu a inhawn reng thu a sawi bawk a ni.

FPO Rural Mart tih hian thingtlang/zokhua kuthnathawkte thar chhuah leh mamawh hralh chhuahna/zawrh na dawr tih a kawk deuh ber a, Bilkhawthlir FPO Rural Mart ah hian kuthnathawkte thar chhuah kuhva rah bakah kuthnathawkte mamawh sangha chaw leh hlo tur te zawrh ani anga,  NABARD tanpuina hnuaia hawn a ni a, Kolasib District a a hmasa ber niin NABARD hian dawr luah man, a nghaktu hlawh leh thil dang tul a hman turin kum 2 chhung a tan cheng 2,43,000/- in a tanpui dawn a ni.