927/2024-2025

2024 Nikir thla ni 24: June ni 27, 2024-a Lai Autonomous District Council (LADC) hnuaia 12-Lawngtlai Chandmary biala Member of District Council (MDC) by-election buatsaih tura hman tur Electronic Voting Machine (EVM)-te chu vawiin khan Lawngtlai DC Conference Hall-ah hman theih turin buatsaih fel (commission) a ni.

He hunah hian Lawngtlai Chandmary MDC bial chhung polling station palia EVM (control unit + ballot unit) hman turte chu election official-te leh political party ai awhte hriatpuiin a siamtu Bharat Electronics Limited (BEL) engineer-te'n hman theih turin an buatsaih a. A khawl lam buatsaih fel vek a nih hnuah candidate-te hming chhut luh niin, a kal dik leh dik loh enfiah leh vek phawt a ni a. Vote thlak nana hman theih mai tura peih felfai a nih hnuah khawih danglam theih tawh loh tura seal hmanga uluk taka char niin, dah ṭhat nghal zel a ni.

Lawngtlai Chandmary bial MDC by-election buatsaih turah hian vote nei mi 2,798 (mipa 1,313 leh hmeichhia 1,485) an awm a. Inthlan chuhtu candidate pathum awmin, ruahman lawk dan chuan June ni 27, 2024 (Ningani) zing dar 7:00 leh tlai dar 5:00 inkarah EVM hmangin vote thlak a ni ang a. Vote tlate hi July ni 1, 2024 (Thawhṭanni) chawhma dar 10:00 aṭangin chhiar a ni ang.