928/2024-2025

2024 Nikir thla ni 24: June ni 27, 2024-a Lai Autonomous District Council (LADC) hnuaia village council council (VC) Inthlanpui buatsaih tura inthlan buatsaih tura ruat Returning Officer (RO)-te leh inthlan buaipui tura ruat Presiding Officer (PRO)-te tan vawiin khan CYLA Hall, Lawngtlaiah training buatsaih a ni.

Chawhma lamah PRO-te tan bik training buatsaih niin, chawhnu lamah RO leh PRO training buatsaih chhunzawm a ni a. Lawngtlai BDO Pu Collin Hlychho chuan inthlan buatsaih dan leh vote chhiar dan tur training a pe a. Election Officer Pu Denny Lalchhuanawma chuan inthlan kaihhnawiha hriat tur pawimawh hrang hrang a zirtir bawk a. Ballot paper leh lehkha pawimawh (form) hrang hrang hman dan te a taka zir ho ni bawkin, zawhna leh chhanna leh sawi hona hun hman a ni bawk.

LADC hnuaia VC Inthlanpui buatsaih turah hian polling station awm sa 99 bakah, voter tam zualnaah polling station 15 dah belh niin, a zavaiin polling station 114 awm tura ruahman a ni a. Polling station tinah hian inthlan buaipui turin PRO 1 leh PO 2 ṭheuh an awm dawn a. Ballot paper hmangin vote thlak tur a ni.

LADC hnuaia VC 99-ah hian general seat 496 leh reserved (hmeichhe tan bik) seat 99, a zavaiin seat 595 a awm a. 46-Hmawngbuchhuah VC-ah chuan inthlan chuh tura endikna (scrutiny) pal tlang zo an awm loh avangin inthlan buatsaih a ni dawn lo va. Heti hian VC 98-ah inthlan kalpui tur niin, inthlan chuhtu candidate 1,511 (general 1,259 leh reserved 252) an awm a. 29-Saikhawthlir VC-a seat 5 awmah chuhtu 5 (INC 1 leh ZPM 4) awmin, khingtu dang an awm loh avangin inthlan buatsaih ngai lova tlinga puan an ni dawn a. 37-Karlui, 38-Karlui-II leh 51-Sabualtlang VC-ahte chuan reserved seat-ah chuhtu pakhat ṭheuh (ZPM candidate 2 leh MNF candidate 1) awmin, khingtu awm lo (uncontested)-a tlinga puan tur an ni bawk.

LADC hnuaia VC Inthlanpui buatsaih turah hian vote nei mi 55,681 (mipa 27,386 leh hmeichhia 28,295) an awm a. Ruahman lawk dan chuan June ni 27, 2024 (Ningani) zing dar 7:00 leh tlai dar 5:00 inkarah vote thlak a ni ang a. Vote thlak zawh fel hnuah Returning Officer-te kaihhruainain polling station hmunah ṭheuh vote chhiar chhunzawm a ni ang.