1621/2023-2024

2023 Thlazing ni 23: Lai Autonomous District Council (LADC) hnuaia village council (VC) pasarih (7)-a hmun ruak pariat (8) hnawh khah tur atan nimin khan by-election buatsaih niin, mipuite'n zing dar 7 aṭangin boruak muanawm tak hnuaiah tluang takin vote an thlak a. Inthlannaa vote tlate chu vote thlak zawh hun tiam, tlai dar 5 hnuah tih tur ṭulte tihfel a nih hnuah chhiar nghal a ni.

Tun ṭuma by-election neihna tura ruahman LADC huam chhunga VC pasarih zinga VC pahnihah chuan candidate awm chhunte chuhtu awm lova tlinga puan an nih avangin vote thlak a ni lo va. 50-Kakichhuah VC general seat 1 ruakah MNF candidate Kaiong chu chuhtu awm lova tlingin, 65-Kawnkhua VC seat 2 ruakah MNF candidate ve ve - Sotirang (general) leh Walati (reserved) te chu chuhtu awm lovin an tling bawk a ni.

VC pahnihah chuhtu awm lova tling an awm avang hian VC panga - 32-Nghalimlui, 47-Dumzautlang, 59-Chamdurtlang-II, 67-Lawngtlai Electric Veng leh 68-Lawngtlai Bazar-ah te general seat ruak pakhat ṭheuh hnawh khat turin vote thlak a ni a. Nghalimluiah vote 68.64%, Dumzautlangah vote 81.46%, Chamdurtlang-II-ah vote 89.77%, Lawngtlai Electric Vengah vote 64.62% leh Lawngtlai Bazar-ah vote 62.36%, a pum puiah vote 65.61% a tla a ni.

Nghalimluiah hian INC, MNF leh ZPM te'n candidate neiin, vote tla 499 aṭanga vote 265 hmutu MNF candidate Johna chu tlinga puan a ni a. Dumzautlangah INC, MNF leh Independent candidate awmin, vote tla 128 aṭanga vote 69 hmutu MNF candidate Jisu Rang chu tlinga puan a ni a. Chamdurtlang-II-ah INC leh MNF-in candidate neiin, vote tla 79 aṭanga vote 41 hmutu MNF candidate Sadonadibi chu tlinga puan a ni a. Lawngtlai Electric Vengah MNF leh ZPM-in candidate neiin, vote tla 654 aṭanga vote 377 hmutu ZPM candidate Pu Tlungchina chu tlinga puan a ni a. Lawngtlai Bazar-ah INC, MNF leh ZPM te'n candidate neiin, vote tla 1,095 aṭanga vote 423 hmutu MNF candidate Pu HT Lalchungnunga chu tlinga puan a ni.

Lawngtlai District Election Officer Pu H. Lalhmingthanga chuan Lawngtlai khawpui chhunga by-election neihna Electric Veng leh Lawngtlai Bazar-a vote thlakna hmun, polling station-te chu vote thlak laiin a tlawh a. Lai Autonomous District Council huam chhungah boruak muanawm tak hnuaia tluang taka VC by-election neih zawh a ni chu lawmawm a tih thu sawiin, inthlan buaipuitute, political party-te leh vote thlaktu mipuite chungah lawm thu a sawi a ni.