1620/2023-2024

Aizawl, 23rd August, 2023 : Lok Sabha MP Pu C. Lalrosanga chuan nikum 2022 January thlaa Sairanga relkawng siamna tur hmunte a tlawhkual laia ban phun mekna hmunpui ber pakhat, Kurung lui chunga lei dawh lai a chim avanga mi 20 chuang  zetin nunna an chan chu pawi a tih thu sawiin, he vanduaina rapthlak tak avanga nunna chante leh hliam tuarte a tawrhpui thu a sawi.

Lok Sabha MP hian he lei dawh lai chimna hmun hi vawiin chhun khan tlawhin a hmuna lo awm Transport Minister Pu TJ Lalnuntluanga, Pu K. Laldawngliana MLA, Home Commissioner Pu Lalengmawia bakah civil leh police lam hotute pawh kawmin chhanchhuah hna thawh kawnga hmalak dan turte an sawiho a ni.

Sairang leh a chhehvel khawtlang hruaitute leh mi tlawmngaiten chhanchhuahna leh ruang hlawm hna an thawh dante chu fakawm a tih thu Pu C. Lalrosanga hian a sawi a . Police leh chhanchhuaktu pawlte chet dan chu chhuanawm a tih thu leh an inpekna leh theihtawpchhuahnaah lawmthu a sawi a ni.

Pu Rosanga chuan Parliament ah pawh a lo sawichhuah tawh he relkawng hi vawiina vanduaina thleng avanga a siam hna  thawh zawh hun a khawtlai deuh dawn ta chu  pawi a tih thu a sawi bawk.