No.2113/2020-2020

Lawngtlai, Nikir thla ni 17, 2020: Lai Autonomous District Council (LADC) sawrkar chuan vawiin khan COVID-19 hri leng dona kawnga a tul anga hman atan Lawngtlai Deputy Commissioner kutah Rs. 3,00,000/- (nuai thum) leh District Hospital Lawngtlai District Medical Superintendent kutah Rs. 2,00,000/- (nuai hnih) an hlan.

LADC-a Chief Executive Member Pu T. Zakunga leh Executive Member-te leh LADC official-te chuan Lawngtlai Bawrhsap thar Dr Andrew H. Vanlaldika chu a office-ah kal chilhin, tanpuina sum hi an hlan a. LADC Executive Secretary Pu H. Lalramenga chuan DC thar hi Lai hnam puan hlanin, LADC chuan thinlung takin an lo lawm tih a hrilh bawk.

Bawrhsap chuan LADC-in hripui do nana anmahni zawna an thawh mek piah lamah, quarantine facility enkawlna leh tul danga tangkai taka hman theih tur tanpuina sum fai District Administration kuta an hlan leh zel chu lawmawm a tih thu a sawi a. District Administration leh District Council inkarah thawh hona tha a awm phawt chuan hri dona chauh ni lovin, hmasawnna kawng hrang hrangah Lawngtlai District chuan hmel thar a hmuh a beisei tih sawiin, District Council leh District Administration lam te felfai leh awmze nei zawka hma lak ho dan tur zawn tul a tih thu a sawi.

CEM chuan ramin hun harsa a hmachhawn mek a, tun hi tan rual hun a ni tiin, LADC sawrkar chuan ama zawnah theih tawp chhuaha hma a lak thu leh Budget Session neih mai theih a nih loh avanga tuna tanpuina an hlan pawh chu tlema khawtlai hret a nih thu a sawi a. DC thar kaihhruaina hnuaiah District Administration leh District Council inkarah thawh hona tha a awm zel a beisei thu a sawi ve bawk.

LADC-a CEM leh Executive Member-te leh official-te hian Lawngtlai District Hospital pawh tlawh nghalin, COVID-19 do nana a tul anga hman atan Rs. 2,00,000/- (nuai hnih) an hlan bawk.

LADC hian CEM Relief Fund for COVID-19 atanga buhfai quintal 1000 an lei chu an sem chhuak mek a. Hei bakah hian, CEM Relief Fund atang hian ramria duty-te leh hri dona kawnga hma latu hrang hrang hnenah pawisa faiin an lo sem chhuak tawh bawk a. Vawiina DC leh District Hospital-a tanpuina sum an hlan erawh hi chu CEM Relief Fund atanga hlan ni lovin, LADC Budget Session neih zawh taka pass a nih angin budget chhung atanga hlan a ni.