State Election Commission (SEC) ruahmanna angin vawiin khan Lawngtlai Addl DC Dr Andrew H. Vanlaldika, MCS chuan Lai Autonomous District Council (LADC) leh Chakma Autonomous District Council (CADC)-a MDC bial ruak pakhat ve ve hnawh khah nana by-election neih tur atana electoral roll siam thar tura behchhana hman tur draft electoral roll chu a office chamber-ah a tlangzarh.

Draft electoral roll-a a lan danin, LADC hnuaia Lungtian MDC bialah vote nei mipa 759 leh hmeichhia 772, an vaiin voter 1531 an awm a; CADC hnuaia Ugudasury South MDC bialah vote nei mipa 744 leh hmeichhia 784, an vaiin vote nei 1528 an awm thung.

Vawiina tlangzarh tak draft electoral roll atanga paih ngai emaw, belh ngai emaw, siam that tur neite tan April ni 27 atanga May ni 1 chhungin claim & objection hun hawn a ni a. Tribal ni lo emaw, mitthi tawh emaw, vote nei kawp emaw an awm chuan paih tur niin, January ni 1, 2019-a kum 18 tling chin roll-a la chuang lote chu thun belh theih a ni bawk. Final electoral roll hi thla thar May ni 9-ah tlangzarh tura ruahman a ni.

LADC huam chhunga Lungtian bial hi a bialtu MDC, MNF ticket-a thlan tlin Pu H. Biakzaua chuan Assembly inthlanah Lawngtlai East bial atanga MLA-a thlan tlin a nih hnuah a chhuahsan a; CADC hnuaia Ugudasury South-a MNF MDC Pu Pranab Kumar Chakma chu nikum July ni 19 khan a thi a; he'ng bial pahnihte hi bial ruak a nih tak avangin State Election Commission chuan by-election nei turin ruahmanna a siam ta a ni.