Tarlan tawh angin March ni 25, 2014 khian Lai Autonomous District Council (LADC) huam chhunga Village Council (VC) inthlanna neih a ni dawn a, vote thlak ni, March ni 25-a candidate ten lirthei an hman dan tur chungchangah vawiin khan State Election Commission (SEC) chuan thuchhuah a siam.

SEC thuchhuah ang chuan Vote thlak ni ah hian candidate tupawh, an mahni puitu, polling agent ten lirthei eng chi mah vote thlaktu tur te phurh kual nan hire emaw lei emaw phal a ni lo a. Candidate pakhat in Returning Officer hnen atanga phalna mumal tak la in lirthei pakhat an vei kual nan an hmang thei ang.

SEC chuan District thuneitu chu candidate ten lirthei an hman dan uluk taka vil turin a hriattir a, dan leh thupek kenkawh lamah harsatna an siam emaw, mipui an tihthlabar leh an tihchiai emaw chuan chung lirthei te chu man a, inthlan zawhfel hma chuan chhuah loh turin a hriattir a, a mawhphurtu chu dan anga a chungthu rel a, hrem theih a ni tih a hriattir bawk.