Higher &Technical Education, Land Revenue & Settlement, Art & Culture leh Parliamentary Affairs changtu Minister Pu R.Romawia chuan vawiin khan a bial Aizawl North I chhunga Durtlang a tlawh.

Pu R.Romawia hi Durtlang Local Council hruaitute’n lo dawngsawngin Durtlang Hall ah amah kawmna hun an hmang a. Durtlang Local Council member-te bakah political party hrang hrang aiawhte, kohhran aiawhte, YMA, MHIP,MUP leh chanchinbumi thenkhatte nen Durtlang khawtlang hmasawnna ngaihtuahin an thukhawm a ni. Khawtlang hruaitute hian an khawtlang mamawh hrang hrangte thlenin Minister hian an thuthlen te chu uluk taka ngaihtuah a nih tur thu leh an mamawh thenkhat an thlen te chu sorkarin hmalakna tur a ruahmanah telh a nih tawh thu a hrilh a ni.

Land Revenue & Settlement Minister chuan ram chu Lalpa ta a nih avangin rama duh am leh diklo taka sumdawn nana hman a remlo tih hre turin mipuite a chah a. Mizorama thubuai tam ber chu ram inchuhna a ni a, thenawmpa ram nek tlat chingte, tute emaw nena thalo taka inremsiam a, diklo taka inhmun lo ram sumdawn nana lo hman te hi thil thiang a ni lo, a ti. Vawi leh khatah inthlakthlengna tha hi thleng thut theilo mahse kan ramah hian hmasawnna a kal bek bek zel a, ram siamtha tur hian theihtawpin hma kan la chhunzawm zel a ni, Pu R.Romawia chuan a ti.