Vawiin chawhma dar 11:00 khan DC Conference Hall, Serchhip-ah District Level Fire Prevention Week hawn a ni a, District Bawrhsap leh Serchhip District Fire Prevention Committee Chairman ni bawk Pi Juhi Mukherjee, IAS chuan khuallian niin a hmanpui a ni.

Khuallian Pi Juhi chuan thu sawiin Mizoram chu ram kang venhimna kawngah Kohhran, Sawrkar leh tlawmngai pawl zawng zawng te, thahnem ngai taka an thawh ho theihna state awmchhun a nih a rin thu a sawi a. Mizoram sawrkar chu sum leh paiah dinhmun tha taka a la din rih loh avangin ram lam atanga kan deh chhuahte hi kan sum hnar ber an la ni a, hei vang hian kangmei laka kan ven hi a pawimawh lehzual a ni tiin kan ram neih hlutna leh a thar chhuah theih tawk lo tla hniam zel hian ven him a tulzia a tilang chiang hle a ni a ti.

Bawrhsap chuan Mizoram chu thil siam chhuahna liantham kan la neih loh avangin, in kang leh ram kang chu kangmei kan buaipui ber an ni a, chenna in kang chu a chhan tam tak awm thei mahse ram kang hi chu lo neih leh a kaihhnawih thilte avang a nih ber avangin hmun tinah VC te an pawimawh a ni a ti a, loneitute chu mei lam tha taka sial tur te, meizial bung paih kawnga fimkhur turte leh lo hal thuah pawh sawrkar dan zawm a pawimawhzia zirtirna pe tam turin a fuih a ni.

Bawrhsap Pi Juhi chuan District Fire Prevention Committee member-te chu kangmei ven kawnga mi rem hre ber ber an nih bik lem loh avangin kangmei chhuak thei tur venna kawnga hmasawnna tur thurawn pe duh tan englai pawhin a inhawng reng a ni tih a sawi a, police department lam te pawh tihpalh leh fimkhur lohna avanga ram tikang an awm chuan bail theih chi ni mahse danin a phal chinah a na thei ang ber hma la thin turin a chah bawk a ni.

He inkhawmah hian Pu JH. Malsawma Executive Engineer, Power & Electricity Department pawhin thu sawiin Electric-in ram leh in a tihkan theih dan te leh chumi laka kan inven dan tur te a sawi a, Mizorama electric vanga inkang tam ber chu Internal Wiring tha lo leh hlui tawh te load sang tak tak kan pek thin avang te leh a ruka energy meter kal tlang lova eirawngbawlna tura kan pawh pen thinte nia a hriat thu a sawi a ni. Tin thu sawitu dang Pu Lalrinthanga, Manager Mizofed, Serchhip branch pawhin Eirawngbawlna Gas fel hlel avanga kangmei chhuah theih dan te, a enkawl dan leh himna kawng te sawiin kalkhawmte zirtirna a pe a, mipuiten an hlawkpuiin an ngaihlu hle a ni.

He inkhawm hi Pu C. Lalbiaka DFO Thenzawl leh Member Secretary, District Level Fire Prevention Committee ni bawk chuan a kaihruai a, vawiin ni vek hian Thenzawl, North Vanlaiphai leh East Lungdar-ah te week hawnna inkhawm hi neih a nih thu leh Serchhip District chhung khaw hrang hrangah Awareness Campaign la neih chhunzawm zel tur a nih thu te a sawi a, sawrkarin kuminah lo hal hun a siam chu March ni 15 hma lam a nih thu leh lo hal niah pawh chawhnu dar 03:00 hnu lam chauha hal phal a nih thu a sawi bawk a ni.

He inkhawmah hian sawrkar officials, tlawmngai pawl leh media lam te an kal tha hle a, inkhawm zawh hian DC Video Conferencing Hall-ah kangmei ven chungchang TV Talk Show neih nghal a ni bawk. He inkhawmah hian Mizo Idol 2014 pathumna Nl. Lancy Remlalhruaii leh 2012 Runner-up Tv. Lalbiakmuana te bakah zaithiam dangten kalkhawmte zaiin an awi bawk a ni.