Vawiin chawhnu dar 12:30 khan CYMA huaihawta Greenland HSS, Chaltlang-a inkhawm neihah 3:16 Plan Solution neitu John Lalpeka chuan 11.5.2013-a Laipuitlang leimin avanga TV leh Refrigerator  chan chhungkaw 14 hnenah Samsung TV leh Refrigerator a pe a, mithi ralna Rs. 1,000 theuh a hlan bawk. Hemi rual hian Greenland HSS neitu Pu Lalthanzauva chuan an school hmingin CYMA kutah he leimin tuarte chhawmdawlna atan Rs. 25,000 a hlan a; Heritage Lounge pawhin CYMA kutah Rs. 17,000 an hlan bawk.

3:16 Plan Solution neitu John Lalpeka chuan thu sawiin, “Mite tanpui thei tura Pathian malsawmna ka dawng hi ka lawm em em a. He chhiatna rapthlak tak hi a tuartu zawng zawngte tan malsawmnaah chang se tih hi ka duhthusam a ni”, a ti.

CYMA aiawha thusawitu General Secretary Pu R. Vanlalruata chuan Mizo zingah mi thilphal leh tlawmngai tak tak, an sum leh pai ui miah lova mi dangte tana luang chhuak tam tak an awm a; hetianga thiltha tih hi kan intihhmuh theihnan CYMA chuan he inkhawm hi a buatsaih a ni, a ti a. YMA Day-ah memberte chu thisen pe tura lo inralring turin a ngen bawk.

Inkhawm kaihruaitu CYMA President Pu T. Sangkunga chuan hmanlai huna chawimawina nopui beiseia theih tawpa tlawmngaih an chhuah thin ang ni lovin, Mizo thangtharte zingah chawimawina leh phut let nei miah lova mi thilphal leh tlawmngai kan pung zel hi a lawmawm tak meuh a. Hei hian mi tam takte ngaih angin tlawmngaihna hi a la tlahniam lo tih a lantir a ni, a ti bawk.