May ni 11, 2013 khawvar hmaa Laipuitlang leimina thi mi 17 te sunna hun, Laipuitlang Relief Committee in Organising Committee a din ina a buatsaih, vawiin tlaia leiminna hmun bula neihah Chief Miniater Pu Lal Thanhawla chuan a hmanpui.

Chief Minister chuan Laipuitlang Relief Committee in chhiat tawhnaa mithi te sunna hun a buatsaih chu a ropuiin an ngaihtuahna a changkang hle tih a tilang a ni, a ti a. He leimin avanga nunna hlu tak chan ta te chu sorkar pawhin a tuarpui tak zet a ni, a ti a, tuarpuilo kan awmlo a ni, a ti.Chief Minister chuan he chhiat tawhnaah sorkar chuan a tih tur a hriatte chu kan ti nghal zung zung a ni tiin, chhanchhuahna hna thawhna kawngah hmalak dan tharte sorkarin a ngaihtuah zel thu a sawi a. In zir thar zel kan mamawh tih pawh kan hria a ni, a ti.

Chief Minister chuan ringtu kan nih chuan harsatna kan tawhte atangte, tlawmna atangte, vanduaina kan tih atangte in Pathianin kan hnenah thu a sawi duh thin a, he chhiat tawhna pawh hi Ama lam min hnaih tir tu ni thei se a duh thu a sawi a ni. Chhanchhuahn hna thawktute leh mipui tlawmngaia kalkhawm ten hotute thuawi’h a, mahni inthununna fel tak an nei kha an fakawm tak zet a, ringtu nih leh Mizo nih a tih nawm phah hle a ni, a ti.

He sunna hunah hian Ramhlun Venglai Local Council Chairman Pu C.Lalhluna, Laipuitlang Local Council Chairman Pu Ramthanmawia leh CYMA President Pu T.Sangkunga ten thusawina hun an hmang bawk a. Pu T.Sangkunga chuan chhiat tawkte tanpuina sum CYMA kuta pek khawm chu Rs.82,06,000/- a tlin tawh thu a sawilang a ni.

Sunna hun inkhawm hi Organising Committee Chairman Pu Lalbiakmawia Khiangte in a kaihruai a. Sunna hun minute khat chhung ngawi renga dingin hman a ni bawk a, 1st MAP Bugler ten tawtawrawt hamin hun an khar a ni.