Vawiin chawhma dar 10:00 khan Green Mizoram Day 2013 hawnna inkhawm CHANEM Complex ah hawnna neih a ni a. Champhai District Bawhsap Pu Lalthangpuia Sailo IAS chu khuallian a ni.

Hawnna inkhawm Pu Vanlalchuailova, DFO kaihhruaiah hian khuallian Pu Lalthangpuia Sailo, DC & Chairman, District Green Mizoram Committee, Champhai chuan thingphun pawimawhna sawiin thing chu sawi aiin mihringte tan a pawimawh a ni tih kan hre theuh a. Thlaler hmun thing awm lohna ah kal ila tah chuan thing tangkai zia a lang a, thing chuan kan thawk luh tur boruak tha min pe a, tui min siam sak bawk a ni, tiin vawiinah pawh hian thing 973 chu hmun hrang hrangah kan phun darh leh dawn a, sum leh pai tam tak kan in sengso leh dawn a, a phun ringawt nilovin phun nun a pawimawh a, kan thingphun chu enkawl zui a, venhim leh dam khawchhuah tir kan mawhphurhna a ni, a ti a. Thingphun tura sorkar department leh zirlai kalkhawmte hnenah uluk leh tha taka an thingphun theuhte venghim zui turin a chah a ni.

Vawiin Green Mizoram Day, 2013 hawnna inkhawmah hian chanchinbu kangmei ven chungchanga editorial ziak tha ber Lenrual daily newspaper hnenah lawmman Rs. 3000/- khuallian hian a hlan a, hemi hnu hian thingphun tura kalkhawm sorkar department hrang hrang leh zirlai kalkhawmte chu a vailiam a ni.

Green Mizoram Programme 2013 hnuaiah hian Champhai khawpui chhunga sorkar hmun pawimawh hrang hrangah thing hi phun a ni dawn a ni.