No.6186/2020-2021 

Siaha; October ni 16: Vawiin  khan Laki khuaah Animal Husbandry & Veterinary bultumin vawk pûlhri chikhat African Swine Fever chungchang inzirtirna hun hman a ni a. He hun hi Pu Lalhmingliana, MCS SDO(C) leh Tipa RD Block Development Officer ni bawk chuan a hmanpui. 

He hunah hian Laki Village Level Task Force te hmaah Dr. Lalthansanga Khiangte, Veterinary Officer, Veterinary Dispensary,  Tipa chuan African Swine Fever chungchanga hriat tur pawimawhte sawiin, kan rama ASF hri lo luh theihna pakhat - Myanmar ațanga vawk lo lut tur ven kawngah theihtawp chhuaha țan lo la turin Laki VLTF te a sawm a ni. 

He hunah hian Pu Lalhmingliana, SDO(C) leh BDO ni bawk chuan thu sawiin, "ASF chu vawk vulhtute thawhrimna zawng zawng engmah lo maia thlen theitu a ni" a ti a. Heng bakah hian khawtlang hruaitute chuan khawtlang hamțhatna tur leh an khaw mipuiten enge an mamawh tih ngaihtuah chunga hma la țhin turin a fuih a. Khawtlang țhatna tur a nih phawt chuan englai pawha a inhawn thu a sawi bawk.

BDO hian Laki VLTF te hnenah hian an mamawha an hman tur sumfai AH & Veterinary Department hnen atangin a hlan bawk a ni.

Hemi hnu hian Khopai khuaa MzSRLM Self Help Group ten vawk an vulhna hmun an tlawh nghal a. AH& Veterinary Department leh Rural Development Department tangkawpin vawk vulhtute  harsatna tawh mekte sutkianpui dan tur an thlirho a.  Helai hmuna an vawk vulhlaite chu Classical Swine Fever vaccine pek nghal an ni.