No.6185/2020-2021

Kolasib 16th October, 2020: Vawiin chawhnu khan DC Circuit House, Kolasibah Pu. K Lalrinliana, Minister of State, Fisheries Department hovin Kolasib Fisheries Cooperative Society leh Village Farming Cooperative Society, Kolasib member-te nen Cooperative Society anga hmalakna tur hrang hrang leh Van Dhan Scheme hman tangkai a nih theih dan tur te sawihoin hun an hmang a, Pi. M.Liansangpuii, Asst. Registrar of Cooperative Societies leh Pi. C.Lalparmawii, District Fisheries Development Officer, Kolasib district-te an tel a ni.

Minister Pu.K.Lalrinliana chuan mimal ang ni lovin, hmasawn duh leh tuina inang intelkhawm a hmalaknaah chuan hlawhtlinna a awm thu sawiin Farming Cooperative Society anga hmathlir leh ruahmanna uar zawk a siam turin vawiin meeting-a lo kal te chu a chah a. Chung ruahmannaah te chuan sawngbawl leh hralhna kawnga buaina awmlo tur chi leh a enkawl danah pawh harsatna awmlo tur chi thlang thiam turin a chah bawk a ni.

Sawrkar laipui hnuaia Van Dhan Scheme leh Pradhan Mantri Matsya Sampada Yojana chu a chhawr tangkaitu ni ve thei turin Minister chuan Society member-te chu a chah a, a scheme-te zirchiang a, a hamthatna dawng theitu ni turin ruahmanna siam a, hlawhtlin tum a bei turin a fuih bawk a ni.

Pu.K.Lalrinliana chuan Lunglei, Saitual, Lengpui, Keifang leh Kolasiba sangha chi tihkeu tum a hmalaknaah duh khawp tharchhuah ala nih loh thu a sawi a,” Sangha chi duh ang zat la tikeu thei rih lo mah ila, hlawhtling tak a engemawzah kan tikeu thei hrim hrim hi thil chhinchhiahtlak tak a ni,” a ti a,” Kum lo la kal zel tur atana Sangha chi a kan intodelhna tur atana hmasawnna rahbi pawimawh tak a nih ngei ka ring a ni,” a ti a, Mizoram chhunga lui dung sanghaah enchhinna kalpui leh mek a nih thu a sawi bawk a ni. Minister chuan Fisheries Department hmalakna hnuaiah Farmer Registration System thar duan mek a nih thu sawiin, he Farmer Registration hmang hian Department hnuaia inziaklut sangha dil siamte chu uluk lehzual a vil an nih tawh tur thu a sawi.

Pi. M.Liansangpuii, ARCS chuan Van Dhan Scheme chungchang leh Kolasib district-a kalpui a nih dan tlangpui sawina hun a hmang a, Society panga (5) thlanchhuah an nih tawh thute leh heng society-te tan hian Training leh hmanrua (Equipment) lakkhawm nan Rs. 55.75 lakhs hmuh a nih tawh thu a sawi bawk a ni.

Vawiin thutkhawmnaah hian heng Society kaltlanga hmalak tawhna thlirletna hun te, Cooperation Department hnuaia hamthatna hrang hrang awm te leh Cooperative Society anga hmalakna turte sawihona hun hman a ni bawk a ni.