Mizoram Plan Fund sawifel tura New Delhi a cham mek, Chief Minister Pu Lal Thanhawla chuan tukin khan Parliament House ah UPA Chairperson Pi Sonia Gandhi hmuin Mizoram Plan Fund 2013 - 14 chungchang leh Mizoram unthlanpui tur chungchangte a sawipui a. Mizoramin sum harsatna a tawh mekte sutkian dan tur a sawipui bawk.

Vawiin vek khan Central Hall of Parliament-ah Union Coal Minister Sriprakash Jaiswal hmuin power/ coal blog chungchang a sawipui bawk a, Mizoram chu power lam tlachham, power a mamawhzia a hrilh a ni. Chief Minister hian Minority Affairs Minister Ninong Ering leh Tribal Affairs Minister Ranee Narah te hmu bawkin Mizorama minority te leh tribal te dinhmun sawipui bawkin, Mizorama lo zin turin a sawm a ni.

Chief Minister hian Mizoram House ah Chief Secretary Pi L.Tochhawng, State Planning Board hotute leh sorkar hotulu dangte nen Mizoram Plan chungchang thlirlawkna an nei bawk a ni.

Vawiin vek chawhnu khan DONER Minister Paban Singh Ghatowar hmu bawkin, Lal Thanhawla hian Mizoram sorkarin ngaihpawimawh bik (priority lists) a neih te tarlangin, a tih puitlin theih dan tur a sawipui bawk a ni.