Mizorama Village Council te intawhkhawmna hun Mizoram V/C Assembly chu vawiin khan Vanapa Hall-ah buatsaih a ni a, he Assembly hi LAD changtu Minister Pu P.C. Lalthanliana’n a hmanpui a ni.

Pu P.C. Lalthanliana chuan Mizorama Village Council member zawng zawngte leh Sawrkar thawhhona a that avangin leh mipui rawngbawlna kawnga an tawiawm that avangin an zavaia chhunga lawmthu a sawi a. Village Council te hi dan hmanga din anih thu leh dan leh dun fel tak neia kal anih thute sawiin, a tih tur leh tih loh tur, thuneihna chin pawh fel tak, dan leh hrai neia kal anih te hi hriatchian a tul a ni a ti a. Sum leh pai khawih lam emaw, hmasawnna hna lam khawih emaw ai mahin khawtlang mipui te inawpna leh rorelna tha tak a awm theih nan mipui hamthatna ngaihpawimawh a, tha taka khawtlang enkawlna leh khawtlang mipuite tha taka chenhona kawng ah a enkawltu leh a roreltu kan ni tih hi thinlunga dah len fo a tul a ni a ti a. Chu chuan development te leh thuneihna sang chu hun in a hril angin a keng chho zel dawn a ni a ti bawk.

Minister chuan khawtlang rolreltu te tih that leh tih that loh ah khawtlang hmasawnna leh ram hmasawnna thui tak a innghah thusawiin hmatlir tha tak neia rorel a pawimawh a ni a ti. NLUP chungchang sawiin Minister chuan NLUP dawngtute vilna kawngah te, a enzuina kawngah te leh hlawhtlin theih nana fuihna kawngte Village Council hruaitute chuan mawhphurna lian tak an nei a ni a ti. Khawtlang hrang hrang hmasawnna in ram pum hmasawnna a siam a ni, tiin an khawtlang theuh a Sawrkar department hmalaknate enpuia, a hlawhtlin ngei nan vilpui turin a chah a. Village Council te chu ram chungchanga a thuneihna sang tak pek an nih thusawiin ram pek chungchangah fimkhur turin a chah tel bawk a ni.

Assembly hi hi Pu Lalchhuanawma, President, Aizawl District V/C Association chuan kaihruaiin, hunserh Rev. P.L. Biakchhawna’n a hmang a. Pu Lawmkima’n inlawmna thuchhah a sawi a, Pu R. D. Lawmkima, Treasurer, Aizawl District V/C Association in lawmthu a sawiin hun a khar a ni. He hunah hian President, Lunglei District V/C Association pawhin thu a sawi a ni.

Mizoram dung leh vang atanga Village Council hruaitute kalkhawm chuan Mizoram pum huap Village Council Association din chu tha tiin hemi atan hian hmalak nise tih an rel bawk a ni.