Indian National Hockey Player Nula Lalremsiami chu vawiin khan Kolasib a thleng.

He hunah hian Kolasib a Department hrang hrang Head of Office te, Mizoram State Sports Council hruaitute, hockey mizoram hruaitute bakah kolasib sports Discipline hrang hrang hruaituten an lo hmuak a.

 He hunah hian kolasib Bawrhsap Pu Zoengsanga chuan India Hockey tana thawh hlawk tak kolasib nula Lalremsiami chu mi chhuanawm tak ani tiin, vanduaina an tawh chungchang ah pawi a tih thu sawiin thinlung takin a tawrhpui thu a tarlang a, hmalam huna hlawhtlinna ropui tak nei chhunzawm zel turin duhsakna a hlan a, Election Officer Pu Vanlalchhuanawma Chawngthu chuan DC Office aiawh in ralna sum a hlan bawk a ni.

MSSC Secretary Pu C Laltlanthanga chuan infiammi te chu fa ang mai a an en thu sawiin Remsiami chu pa nei tawhlo mahse sports discipline hruaitute chu Nu leh Pa anga ngai turin a chah a, Sports Minister Pu Robert Romawia Royte pawhin a ngaihven em em ani tiin harsatna leh tanpui a ngaih na ah chuan Minister pawh a in hawng reng ani a ti.

Pu Laltlanthanga chuan Remsiami chu fighter chhuanawm tak ani tiin huaisen takin harsatna a hmachhawn a, a tum a ruh em em a mi hlawhtling tur mizia a pu ani tiin chhuanawm a tih thu a sawi a ni.

Nula Lalremsiami chuan a hlawhtlinna lawmpuitu te leh a Pa boral ta sun puitu te chungah lawmthu a sawi a, Sports Minister Pu Robert Romawia Royte bakah Sports hruaituten an ngaihsak em em ani tiin an tulpuina zawng zawng ah thinlung takin lawmthu a sawi bawk a ni.

Lalremsiami hi a Pa Pu Lalthansanga zote chuan june ni 21 khan heart attack avangin a boral san a, Hiroshima ah women's FIH series an khelh laklawh avangin vawiin khan a rawn haw a ni. 

He hunah hian Mizoram Hockey President Pi Zothankimi, kolasib District sports Committee Secretary Joseph Lalrinmawia, kolasib Sub Hqrs YMA President Pu C Liankunga ten thu an sawi bawk a ni.