Vawiin khan Serchhip District Consultative Committee (DCC)/District Level Review Committee (DLRC)/ District Level Security Committee (DLSC) chu an Chairman Pi Sangchhin Chinzah, Bawrhsap ni bawk hovin an thukhawm a.  Quarter ending March, 2019 chhunga district chhunga Bank hrang hrang te hmalakna an thlir ho.

Chairman Pi Sangchhin Chinzah chuan, bank te chu ram hmasawnna hnathawktu pawimawh an ni a, bank kaltlangin sawrkar pawhin hmasawnna hnathawh tam tak a nei bawk a. Chuvang chuan kan district in hmasawnna ke kan penna kawngah bank te an pawimawh em em a ni, a ti a.  Tun quarter thlirlet chhunga Serchhip District Credit Plan hmasawnna (achievement) 74.755 chu quarters dawtleh ah chuan 85% tal tlin tum a duh thu sawiin, Credit Deposit Ratio (CD Ratio) 46% chauh a ni pawh chu a hniam lam deuh nia a ngaih thu a sawi bawk. CD Ratio tura beisei zat hi engtiklai pawhin 60% a ni.

He meeting a pharh, March 2019 quarter tawp a Serchhip District chhunga bank hrang hrang te hmalakna tlangpui chu hetiang hi a ni. Financial Inclusion Plan hnuaia hmalakna ah mihring 2000 aia tlem chenna khaw 11 ah Indian Post Payment Bank (IPPB) hmalakna in Core Banking Solution facility dah tawh an ni a. Dah hmabak la awm khuate hi meeting chuan kumin September thla ral hmain tihfel tum nise tiin rawtna a siam nghal a. Social Security Scheme hnuaiah PMJDY Account thar 214. PMJJBY Account thar 236, PMSBY Account thar 361 leh APY Account thar 22 hawn a ni a. APY Account ah hian United Bank of India in Account hawng thar hnem berin a dang zawngah te khian Rural Bank chuan an hawng tam ber vek a ni.

Bank hrang hrang te district Credit Plan lak khawmin  Agriculture ah target 2084.54 lakh a nih laiin a taka tih 1479.43 Lakh a awm a, za zela 70.97% puitlin a ni. Industry ah target 1582.2 Lakh a nih laiin puitlin zat 1141.37 a ni a, za zela 72.14% puitlin a ni. Service sector ah 1395.58 Lakh Target a ni a, puitlin zat chu 1163.16 Lakh niin, za zel a 83.35% puitlin a ni. Crop Loan hi target 1190 lakh a nih laiin a taka puitlin chu 258.57 Lakh niin za zela 21.73% puitlin  a ni.

Credit Deposit Ratio hi district pumpuiah deposit Rs. 28375.61 Lakh a nih laiin chung atanga Advances pek chhuah hi 13132.45 Lakh chauh a ni a. Za zel a 46% puitlin ang a ni. Hetihlai hian sawrkar in bank te tana CD Ratio ni tura an beisei zat chu 60% tal a ni tur a ni a. Vawiina meeting chuan Quarters dawtleh lamah chuan CD Ratio sang zawk nei tura bank hrang hrang ten hmalak ni se, tiin a rel nghal a ni.

Heng te bakah hian bank hrang hrang te hmalakna dang chipchiar taka sawi ho a ni a. Hmasawn an mamawhna lai te, harsatna an tawhna lai te leh hmalam zel atana mamawh thil chi hrang hrang te members ten an sawi hova, sawrkar department hrang hrang ten bank kaltlanga hmalakna an kalpui hote pawh chipchiar deuh takin vawiin hian sawiho a ni.

Vawiin meeting ah hian Pi Lalnilawmi, Chief manager Lead Bank, Pu. R. Ralkhuma, Chief Manager,  Lead Bank, Pu Henry L. Hrahsel, Director, RSETI, Pi Zinia Baruah, Manager, RBI, Aizawl, Pi Beena Damodaran Nair, AGM, NABARD leh Serchhip district chhunga bank managers te, sawrkar officers pawimawh te, tlawmngaipawl aiawh te an tel a ni