Vawiin khan International Day Against Drugs Abuse and Illicit Trafficking pualin Dr Lalrozama, IAS District Bawrhsap hovin Govt. Mamit Higher Secondary School leh Govt. Mamit High School zirlai naupangte'n ruihhlo duh lohna thuziak kengin High School veng atanga Charkawn Mamit thleng  kawngzawhna neih a nih hnuah Mamit Presbyterian Kohhran Hall-ah hun hman chhunzawm a ni.

He hun Khuallian ni-a hmanpuitu Dr. Lalrozama chuan khawvel hmundangte ruala Drugs hman sual duh lohna hun hmang theia an awm chu lawmawm a tih thu a sawi a, zirlai naupangte leh zirtirtute bakah Sorkar Officials aiawh kalkhawmte chungah lawmthu a sawi. Khawvelin a ngaimawh leh thalaite nun suattu ruihhlo hman sual chu Mamit District pawhin a doin a duh lo ve a, kan khawtlangah ruihhlo leh a zuartute um bo turin mimal, khawtlang, sorkarte nen kan thawh tlan a ngai a ni tiin thawhpuiah a sawm nghal a ni.

Zirlai naupang duhawm tak takte chu hmakhaw eng tak an nihna engmah nilo a siam theitu, an nih tur ang ni lova siamtu, khawtlang, kohhran, ram leh chhungkaw tana chhenfakawm lova siamtu ruihhlo leh a kaihhnawih reng reng laka fihlim tum turin a chah a, ruihhlo tih chhin chak rual lek in ni a, mahse he thil hi ka nih tur ang min nihtir theilotu a ni ti a do tlat turin a chah bawk a ni.

International Day Against Drugs Abuse and Illicit Trafficking hmanna hun hi Pi R. Lalnunthari, District Education Officer chuan a kaihruai a, Pu Jason Lalrinchhana, SI Excise & Narcotics Department leh Pu HT Lalmawizuala, Judicial Magistrate, 1st Class District Legal Services Authority-te chuan Drugs hman sualin nghawng tha lo a neih dan hrang hrangte a lem nen zirtirna an nei a, Zirlai naupangte leh zirtirtute bakah Sorkar Department aiawhte an tel a ni.

Kumin International Day Against Drug Abuse and Illicit Trafficking thupui atan hian Health for Justice, Justice for Health niin vawiin atanga karhnih chhung hian Mamit khawpui chhung High School zirlaite bakah District Jail-ah Drugs hman sualin nghawng thalo a neih dan zirtirna mithiam te'n an nei thin ang.