Mizote kut ropui ber Chapchar Kut chu Vau thla (March) ni 4, 2016 hian A.R. Lammual-ah ropui taka hman tum a ni a. Chief Minister Pu Lal Thanhawla chu Kut Pa niin, Art & Culture Minister Pu R.Romawia chu Kut Thlengtu a ni ang. Mizo hnam lam hmuhnawm tak te, hmanlai atanga tun thlenga Mizo inthuam dan chi hrang hrang te, Khuangchawi hmuhnawm tak leh naupang pawnto hlimawm tak tak te entir a ni ang a. Zaithiam tak tak zai ngaihthlak tur a awm reng bawk ang. Naupang kum 11 hnuai lamte’n Mizo thuam an entir ang a; a hruaitu nu leh pate paw’n Mizo inthuamna nen ngei lawmman dawnpui tur a ni ang.

Chapchar Kut denchhen hian Vau thla ni 1-4, 2016 chhung Assembly Annex-ah Flower Show ropui tak neih tur a ni a. Hemi chhung vek hian Vanapa Hall Corridor-ah Painting & Photo Exhibition hmuhnawm tak neih a ni bawk ang.

Mizo hnam rohlute chawi nun zel a nih theih nan Kut ni hian Mizo inthuamna nen ngeia inthuam turin mi zawng zawng ngen an ni.