National Disaster Management Authority (NDMA), New Delhi leh Mizoram sorkar-a Disaster Management & Rehabilitation Department tangkawp workshop leh exhibition chu neih mek zel a ni a. Vawiin khan BSF hnuaia National Disaster Response Force (NDRF), Guwahati atanga lo kal te chuan Sipai Lammual-ah chhiatrupna thlen palha chhanchhuah hnathawh dan chi hrang hrang chu mipui hmuhah an entir a ni. NDRF Live Demonstration neihnaah hian Mizoram Governor Lt.Gen.M.M.Lakhera chu Khuallian niin Minister of State, DM&R Pu N.K.Chakma leh NDMA Member Pu K.M.Singh te chu Khual zahawm an ni.
 
 

Khuallian Governor chuan NDMA leh NDRF te Mizorama lo kala Mizo mipuite hnenah chhiatrupna thlen chungchangah zirtirna tha tak tak an rawn buatsaih thei chu lawmawm hle a ni, a ti. Chhiatrupna thlen palh chungchangah Mizoram hmalakna chu ala beitham viau thu leh hetiang huna chhanchhuah hna thawk tura mithiam bik kan neih NDRF hnai berte chu Guwahati-ah daih an awm thu sawilangin Governor chuan Mizoram police leh homeguards te chu training pek a tul a ni, a ti bawk. Chhiatrupna thlena chhanchhuahna hnathawk tur chuan thalaite an tangkai hle thin avangin Mizo thalai a tam thei ang ber chu disaster management lama training pek a fuh a rin thu a sawi bawk.

NDMA Member Pu K.M.Singh chuan an hmalakna zawng zawngah Mizoram Chief Minister leh sorkar thlawpna tha tak an hmuh zel avangin an chungah lawmthu a sawi a. Mizoram chu lirnghing hlauhawmna hmun ‘Seismic Zone-V’ ah a tel ve avangin NDMA chuan Mizo mipuite chu chhiatrupna thlen pawha chhanchhuah hna an thawh thiam theihna turin training pek an inhuam thu a sawi a, training pe turin NDRF rawn tirh an ni ang, a ti. Khawvel hmun hrang hrangah chhiatrupna a thlen hian a tuartute zinga tam tak chu sikul naupang an nih thin avangin NDMA chuan Mizoram sorkar nen tangkawpin sikul building tha sak an tum thu a sawilang bawk a ni.

Vawiin Lammuala NDRF Live Demonstration entirnaah chuan sikul naupang leh zirtirtu te, Mizoram District hrang hranga disaster management kaihhnawih department officials bakah Mizoram Police, Assam Rifles leh BSF hotute an tel tha hle a. NDRF uifingte hmanga ‘Canine Demonstration’ an entir chuan mipui lawm a hlawh hle bawk a ni.
 
 
 
 
 
 

Attachment

  • Loading attachment...