Vawiin khan Mizoram State Tobacco Control Society (MSTCS) chuan an office Conference Hall, Chaltlang ah Mizorama Vaihlo thar chhuak leh hralh chhuak tute nen vaihlo leh a kaihhnawih bakah India sorkarin hemi chungchang a dan a zam te zirhona hun a buatsaih a, hun lo kal zel atana thawhhona tur kawng dap a ni nghal bawk. Pu S. Laldingliana, Parliamentary Secretary (Health) chu khuallian a ni.

Khuallian hian Mizorama Vaihlo leh a kaihhnawih in kan hriselna a thihchhiat nasat zia leh chumi avanga vaihlo hi kan do a tul tawh zia thu a sawi a. Dr. P.Sangzuala, Mission Director, NRHM chuan kal khawmte lawmna thu a sawi a, tun hnaia vaihlo leh a kaihhnawih chungchanga dan rawn chhuak thar te sawi in, he dan hi Mizoramah pawh hman a tul zia thu a sawi bawk.

Dr. Jane R.Ralte, State Focal Point, MSTCS chuan vaihlo chungchang a hriat tur tlanglawn te kal khawm te hnenah a hriattirna a nei a. Dr. Zoramthanga, Senior Specialist, Civil Hospital Aizawl chuan Vaihlo in mihring taksa a nghawngthalo a neih hrang hrang te zirtirna hun a nei a, chumi zawh chuan sawihona hun tha tak neih nghal a ni. Pu Lalengliana, Advocate, BAR Association of Mizoram pawh in Tobacco Control Laws zirtirna hun a nei a, zawhna hun hlawhtling takin hman a ni. Pu Thanseia, Secretary, Indian Society on Tobacco & Health (Mizoram Chapter) in he hun rawn ngai pawimawh tu te hnenah lawmthu sawiin he workshop hman a ni thei hi Mizoram tan pawh kawng tha a sial chhoh theih ngei a beisei thu a sawi.