Aizawl Lammual thar lawm nan vawiin khan Santosh Trophy Mizoram Team Vrs The Rest of Eleven exhibition match neih a ni a, Football Exhibition Match hi Chief Minister Pu Lalthanhawla'n a hawng. He hunah hian Parliamentary Secretary to CM leh MFA President ni bawk Pu Lalthanzara, Ministers Pu R.Lalzirliana, Pu S. Hiato, Pu N.K.Chakma, Pu H.Rohluna, Pu Zodintluanga, Parliamentary Secretaries Pu K.S.Thanga leh Pu S.Laldingliana bakah CM nupui Pi Lal Riliani te an tel a ni. 

Khuallian Chief Minister Pu Lal Thanhawla chuan inkhel hawnna thuchah sawiin infiammi ruitheih thil leh zuk leh hmuama fihlim lote chu state aiawh turin thlan an ni lovang a, sports association-te ngaihsak pawh an hlawhzui loh tur thu leh Mizo thalai te chu khawvel pum huapa lang thei tura tan la tur leh insum thei turin a chah a ni. Kumin chhung ngeia Lunglei Thuamluaia mualah artificial grass turf phah turin sum pawh a awm tawh thu te, Lammual gallery siam nan tender koh a nih tawh thu leh kum upa lam te pawh an kalna tur wheel chair pawh hman theihna tur siam a nih tur thu a sawi bawk. Thenzawla Hockey khelhna hmun pawh artificial turf-a siam mek anih thu sawiin Mualpui-a Rajiv Gandhi Stadium pawh chak taka sak mek zel a nih thu a tarlang. Chief Minister chuan nakuma North East Sports pawh Mizoramin a thlen hman theih tura tan lak tum a ni, a ti bawk. 

In khelh tan hma hian Khuallian leh mi pawimawh dang ten player-te hmel hriattirna leh thlalak hona an neipui a. Player-te hian mipui entute chibai buk nan Field chhung sirah an tlan kuala, mipuiin an lo lawm hle a ni. Vawiin Football Exhibition Match ah hian Santosh Team leh Rest of Eleven ten Goal 2-2 pet lutin, chak zawk an awm lo a ni.