No.6804/2020-2021

Lunglei 8th Dec 2020 : Vawiin chawhma dar 11:30 khan Pu Lawmawma Tochawng MLA,HPC Vice Chairman chuan Lunglei District chhunga Rubber chingtu Lungsen, Zawlpui, Bolia Veng, Bunghmun leh Marpara South khua a miten Rubber an sawngbawlna tur khawl leh hmanraw dangte (Rubber Rolling Machine  & Accessories )  District Land Resources, Soil and Water Conservation Office, Lunglei kawt zawl atangin a vai liam.

Khawl sem chhuahna inkhawm tawi buatsaih, Pu F.Lalramnghinglova kaihhruaiah HPC Vice Chairman Pu Lawmawma Tochhawng chuan Lunglei District atanga rubber kan thar chhuak ve dawn ta mai chu thil chhinchhiah thlak tak ani tiin a buaipuitu Department a thawkte leh Rubber chingtu kuthanthawktute thawhrimna avangin an chungah lawmthu a sawi a. Khawl dawngtute chu an hmanraw dawnte a nihna tur taka tangkai taka hmang turin a chah a. High Powered Committee chu kut hnathawktute lakah a tlanchhe dawn lova, an tih ve tur a awm anih chuan englai pawhin an inhuam reng tih a sawi. Rubber hi khawvel hmun hrang hrang ah tangkai taka hman ani a, Rubber hman tangkaina a pun zel thu leh a hlutna pawh a san zel thu a sawi a. Rubber chingtute chu an huan enkawl na kawng ah taimakna leh teirei peihna nei turin a chah bawk a ni.

Rubber sawngbawlna khawl leh hmanrua dawngtute hi Lunglei District-a khaw panga atangin chhungkaw 40 niin khawl unit 11 pek chhuah  an ni a. MIRSAC Data record atanga a lan danin Lunglei District chhungah hian rubber chin theihna tur Hacter nuai 1.6 a zau awmin tuna rubber chinna hmun hi Hectare 500 vel a ni.