380/2023-2024
Dated Aizawl the 9th May 2023 : Vawin khan Land Resources, Soil and water conservation Minister Pu R Lalzirliana'n Synod Hospital Durtlang chu Coffee Peeling leh Grinding machine a hlan.
He hlanna puala inkhawm tawi buatsaih ah hian Minister Pu R Lalzirliana chuan an hun hman chu thil chhinchhiah tlak a ni, a ti a. Synod Hospital Durtlang in a Coffee chin nachang an lo hria chu a fakawm a ti a, coffee kung enkawl zui na lampang ah Soil Department in hma an lak pui thei tur chu a hlawkthlak dawn hle a ni a ti.
Minister chuan tunlai ah Global warming in nghawng lian tak a nei a, Mizoram pawh a nghawng nasat ber tur te zing a mi ani a, chuvang chuan ngaw daihlim a coffee lo chin te hi a hlawk thlak hle a, a bik takin Durtlang Hospital a hna thawk tu te tan phei chuan an hunawl neih tlem te an hman tangkai theih na leh rilru chhawk zangkhaina tur tha tak a nih a besei thu a sawi.
Synod Hospital chu thlei bik neilo damdawiin a nih avangin tumah admit duh loh an neilo a, chung zingah chuan hospital bill pe theilo tamtak anlo awm ve avangin hlawkna an hmu thinlo a, amaherawhchu an rawngbawl na a ropuiin fak tlak a ni takzet a ni, a ti.
Synod Moderator Rev.Dr.C.Chawnghmingliana pawh in thusawina nei in an khawl chu a hmel en maia ho taka lang, mahse ropui tak a ni, a ti a. An coffee huan pawh a enkawl dan felfai taka an hriat loh avangin kung sang tak tak a awm nual a, chung chu soil department in a enkawl na ah kaihhruaina an pe thei tur chu a lawmawm hle a ni, a ti.
Moderator chuan Synod hospital chu huapzo a ni a, a chang chuan damlo thenkhat in Bill an pek theihloh tling khawm avangin Hospital intodelh lo anga hriat ni thin mahse an hospital rawngbawl na chu chak zawk in kalpui a, mite tan malsawmna nih chhoh zel chu a tum a ni a ti a, Hospital chu kohhran inthliarna leh thlei bik neilo a ni, a ti. Tin, sawrkar in kawng hrang hrang, electric leh tui lakna kawng ah te a tanpui thin chu an lawm thu a sawi bawk a ni.
Land Resources, Soil and water conservation Department coffee herna khawl Minister in Durtlang Hospital a hlan hi TGI Coffee Grinder leh Farm type Baby hand pulper a ni a. A peeler hian darkar khat ah Kg 100 vel a peel thei a, grinder hian darkar khat ah kg 8-12 vel a her thei a ni.
Vawiin a inkhawm tawi ah hian Minister leh Synod Moderator te bakah Soil and Water Conservation Director, Pu Hualthanga Chhakchhuak, Synod Hospital Director, Dr Lalthakima, Hospital Co Ordinator, Upa Lalrinmuana, Soil Department staff, Synod Hospital staff, Durtlang Local Council hruaitu te leh sawmbik mi pawimawh te an tel a ni.
Attachment
- Loading attachment...
