379/2023-2024

2023 Ṭomir thla ni 9: Chakma Autonomous District Council (CADC) hnuaia Member of District Council (MDC) Inthlanpui, 2023 buatsaihah bial (constituency) 19-a polling station 67-ah te vawiin khan tluang takin vote thlak a ni.

Vote thlak hi zing dar 7-ah ṭan a ni a. Vote thlak hma hian Electronic Voting Machine (EVM) khawl ṭhat leh ṭhat loh enchhin nan mock poll neih a ni a; polling station ṭhenkhata khawl lama harsatna awm deuh pawh chinfel nghal niin, tluang takin vote thlak a ni a. Tlai dar 5 thleng vote thlak hun hawn niin, hemi hun chhunga vote thlak zawh hman lohna polling station ṭhenkhatah chuan polling area-a lut hman chin tan hun hi pawh sei a ni.

CADC Inthlanpui vawi 11-naah hian Lawngtlai Bawrhsap Pu David Lalthantluanga chu Returning Officer a ni a. Election Observer atan Constituency 1-10-ah Sports & Youth Services Department Director Pu Lalnunhlua leh Constituency 11-20-ah Printing & Stationery Department Controller Pu R. Vanlalsawta te chu ruat an ni a. RO leh Observer te hian inthlan kalpui dan endikin polling station hrang hrang an tlawh kual a. Polling station an tlawhnaah hian Lawngtlai Superintendent of Police Pu Pukhraj K. Gupta  leh official dangte'n an ṭawiawm a ni.

CADC-ah hian MDC constituency 20 a awm a. 15-Rengkashya MDC Constituency-a Bharatiya Janata Party (BJP) official candidate Pu Amit Kumar Chakma chu May ni 4, 2023 zan khan mi kut tuara a thih avangin State Election Commission (SEC) chuan 15-Rengkashya MDC Constituency bik tan inthlan hi May ni 17-a neih turin a sawn hla a. Hei vang hian vawiin May ni 9 khan Constituency 19-a polling station 67-ah chauh vote thlak a ni ta a ni.

Constituency 19-a polling station 67-ah vote thlak nana hman Electoral Voting Machine (EVM)-ah vote awm thei zawng zawng 34,474 (mipa 17,455 leh hmeichhia 17,019) aṭangin chawhnu dar 1 thleng khan vote 20,462 (mipa 9,022 leh hmeichhia 11,440) a tla a, chu chu 59.35% a ni.

Inthlan nia election duty avanga mahni vote neihna hmuna vote thlak thei lo turte hnen aṭangin postal ballot hmanga vote thlak dilna 108 dawn niin, postal ballot vote tla 103 a awm a. Vawiin chawhnu dar 1 thlenga EVM vote tla leh postal ballot vote tla zat belh khawm chu 20,565 a ni a, chu chu vote awm thei zat (34,474) aṭangin 59.65% a ni.

Ruahman lawk dan chuan, CADC MDC Inthlanpui 2023-a vote tlate hi May ni 11, 2023 (Ningani) khian Chawngte SDO (Civil) Complex-a Counting Hall pahnihah zing dar 8:00 aṭangin chhiar a ni ang.