378/2023-2024

Aizawl the 9th May 2023: Mizoram State Sports Council hnuaia Non-Residential Coaching Programme (NRCP) 2022-2023, ‘1st Annual Felicitation of High Achievers’ (NRC trainees-te zinga tithate lawmpuina) chu vawiin khan Dawrpui Multi-Purpose Centre-ah hman niin Sports & Youth Services Minister leh MSSC President ni bawk Pu Robert Romawia Royte chuan khuallian niin a hmanpui a, NRC Programme for Athletics and Judo chu a hawng nghal. Youth Affairs & Sports Development Board Vice-Chairman Pu T.C. Pachhunga chu khualzahawm a ni bawk.

Khuallian Pu Robert Romawia Royte chuan NRCP-a tithate lawmpuina hun hman a ni chu lawmawm a ti hle a, infiamnaah chuan chawimawina chu hlu bikin, chumi hriaa lawmpuina hun buatsaih a ni chu a lawmawm hle a ni a ti. Sports and Youth Services Minister chuan vawiina chawimawina hlan chu sawifiahin MSSC NRCP hnuaia sport discipline 6 bika trainees-te tan bik a ni a ti a, nakkum atang chuan NRCP-ah hian Athletics leh Judo pawh tel tawh dawn thu a sawi. Minister chuan infiammite a bika enkawl nan Mizoramah 'Khelo India' hnuaiah state centre of excellence for boxing, wrestling leh weightlifting tan an neih thu a tarlang a, chungte chu NRCP nen thlunzawma thawhho tha a tih thu a sawi bawk. Khuallian chuan infiamna zirna school ‘Sports School’ neih a chakawm hle a ti a, chumi tan chuan sawrkarin theihtawpin hma la mekin a hlawhtlin hunah chuan infiammite tan mellung pawimawh tak a ni dawn a ni a ti. Minister chuan Mizoram sawrkarin infiamna a ngai pawimawh hle a ni tiin infiamna lama thalaite tuihalna tireh turin theihtawp a chhuah mek a ni a, sports infrastructure-ah Mizoram chu rahbi thar a kaichho mek chuan rah tha a chhuah ngei dawn a ni a ti.

Pu Robert Romawia Royte chuan thalai zu ngawlvei leh ruihhlo ti tam lutuk chu runthlak a ti hle a, chung mite chu infiamna hmanga chhanchhuah an nih theih a beisei thu a sawi a. Mimal, chhungkua leh khawtlang tanho chuan infiamna hmangin ram a siamthat theih thu sawiin Minister chuan Mizote chu hmathlir tithui a, chim chin zauh zel tura fuihin, Mizo zinga infiamna lama hma lo sial tawh tute entawn a, an hnung zuia Mizoram tan theihtawp chhuah turin a fuih a ni.

Khuallian Minister chuan Mizo-te chu a bikin athletics-ah tan la zual turin a duh a, sports hmasawnna chu engemaw chenah medal lak tamah a innghah avangin medal tamna infiamnaah tan lak zual a ngai a ni a ti. Minister chuan infiamna chawinun zel nan leh thalaite chochhuak a phurna petu a tan Jump Rope Show bikah National Level Competition Mizoram in a thlen ngei theih nan hmalak tum a ni a ti bawk.

Khualzahawm Pu T.C. Pachhunga pawhin thu sawiin MSSC NRC programme-in kum khat chhung leka award 57 lai a la thei chu chhuanawm a tih thu leh infiammi te, nu leh pa te leh tawiawmtute inpekna leh taimakna zar a ni a ti. Khualzahawm chuan Olympics-a tel pha Mizo 2 an awm thu tarlangin a aia tam zawk neih theih nan theihtawp chhuah turin kalkhawmte a fuih a. Mizoram-ah infiamna chuan hmabak eng tak a nei a ni tiin Pu T.C.Pachhunga chuan infiammite chu hriselna ngai pawimawh turin a fuih a, ei leh in a insum turin leh taksa sawizawi lama tan la turin a fuih a ni.

MSSC Non-Residential Coaching Programme 2022-2023 trainees-te lawmpuina Mizorama a vawikhat nana hman hi Pu John Tanpuia, Mizoram State Sports Council Secretary-in a kaihruai a. NRC programme documentary tawi thlir ho niin lawmpuina thilpek hlanna hun neih ni bawkin MSSC Joint Secretary Pu C. Lalrinzuala in lawmthu sawiin hun a khar a ni.

Mizoram State Sports Council Non-Residential Coaching Programme 2022-2023 chu ni 13 July, 2022 hawn a ni a, a bultan nan discipline hrang hrang 6 - Basketball, Boxing, Table Tennis, Tennis, Weightlifting leh Wrestling-ah te coaching programme hi kalpui a ni. He coaching programme hi Mizoram Sports Policy zulzuiin infiammiten awlsam zawk leh man chawi lova zirtirna an dawn theihna atana duan a ni. He coaching programme-ah hian naupang kum 17 hnuailam bakah sportsperson mi bikte chu enkawl theih tura duan niin ruahhmanna felfai tak siam a ni.

Kum 2022-2023 chhung khan Mizoram State Sports Council Non-Residential Coaching Programmme chu hlawhtling taka kalpui a ni a, hun tawite chhungin a hnuai ami ang hian achievement neih a ni :
1) National Level a Medal lak zat-3
2) Regional Level a Medal lak zat-12
3) State Level a Medal lak zat -42
4) Total No of Medals Achieved- 57