Vawiin khan Land Resources, Soil & Water Conservation Minister leh Chairman Rubber and Allied Crops Development Board ni bawk Pu R Lalzirliana hovin Vice Chairman Pu Lalrinsanga Ralte, MLA leh Member te Board hma lakna tur sawiin Minister Office ah an thukhawm. 

Rubber & Allied Crops Development & Board meeting kaihruaiin Minister Pu R Lalzirliana chuan Department ten Board Member Secretary Pu Valbuanga hova rang taka hma lakna tur proposal tha tak an siam chu lawmawm tiin Development Board zinga hma lakna tur ruahmanna pharh thei hmasa pawl kan niawm e, a ti a. Board Vice Chairman Pu Lalrinsanga Ralte chuan tharchhuah reng rengah, a hralhna market hi a pawimawh berah, chuvangin a hralhchhuahna lamah market linkage kan siam a pawimawh dawn a, chutiang hawi zawnga a tir atanga hengte pawh ruahmanna in a huam tel tha a  tih thu a sawi a ni. 

Secretary, LR, S&WC Pu Valbuanga Rubber & Allied Crops Development Board, Member Secretary ni bawk chuan SEDP hnuaia Board hma lak tum dan leh hmachhawp te sawiin hma lakna tur ruahmanna an lo duan chhin te pharhin chungte chu a sawifiah a. Rubber bika hma lakna tur chu kum 10 atan duan chin niin a kum khatna ah Kolasib, Mamit leh Lunglei District, rubber thatna hmun ah te kalpui tum Department a ruahman chu Board chuan tha an ti a. Member thenkhat te chuan cluster leh chhungkaw behchanna ruahmanna te hi kalpui tha an tih thu a sawi lang a ni. Link Road pawimawhna chu meeting a sawilan niin hei hi Department dangte nena sawiho a, a ruala convergence a kalpui dan zawn tha an tih thu Member te hian an sawi bawk a ni. 

Board in SEDP kaltlanga hmalak a tum ruahmanna te chu - rubber behchan a loneitute leh thingtlang lamah awmte tan eizawnna siamsak thei tur project cheng vaibelchhe 1659.34 te; Mizorama coffee chinna hmun hma te tizauhna tur leh coffee kung natna in a tichhiat te thlak a, a thar chinna tur project cheng vaibelchhe 85.87 te; hmunphiah chin belhna tur project cheng vaibelchhe 107.47 te; kuhva chinna hmun tih zauh leh a sawngbawlna tur project cheng vaibelchhe 81.64 te leh ruahtui avanga ram chhe thei tur venna ni paha loneitute tangkaipui thei tur project cheng vaibelchhe 109.05 te an ni.